Innovatsion rivojlanish vazirligida Isroilning TecTum kompaniyasi ijrochi direktori Rotem Gans va Isroil—O‘zbek savdo palatasining bosh direktori Sari Svi bilan uchrashuv bo‘lib o‘tdi. Bu haqda “Daryo”ga vazirlik matbuot xizmati ma’lum qildi.
Mehmonlarni Innovatsion rivojlanish vaziri Ibrohim Abdurahmonov, vazir o‘rinbosari Yo‘lbarsxon Mansurov qabul qildi, yig‘ilishda vazirlikning boshqa mas’ul xodimlari ham ishtirok etdi.
TecTum kompaniyasi tadbirkorlikni rivojlantirish maqsadida kichik va o‘rta biznes ehtiyojlarini, muammolarni va texnologik kamchiliklarni inobatga olgan holda munitsipal va mahalliy sheriklar bilan hamkorlik qiladi.
Kompaniya texnologik tahlil va tadqiqotlardan foydalanib, biznesning eng muhim ehtiyojlarini belgilovchi o‘sish sektorlarini yaratish uchun ekotizimning eng muhim ishtirokchilari, jumladan, mahalliy va federal hukumat vakillari, notijorat tashkilotlari bilan birgalikda o‘z faoliyatini olib boradi.
Ko‘p yillar davomida kompaniya Isroil ekotizimining uch ustuni — metodologiya, texnologiya, infratuzilmani aniqlash bo‘yicha tadqiqotlar o‘tkazib kelmoqda. Endilikda esa ularni boshqa davlatlarga ham tatbiq etish orqali mamlakatlararo munosabatlarni yanada mustahkamlashga kirishmoqda.
— Isroil bilan O‘zbekistonning o‘xshash tomonlari bisyor, — dedi Rotem Gans. — Deylik, bizda ham, sizda ham suv tanqisligi mavjud. Isroil juda qisqa muddatda texnologiyalar orqali o‘z iqtisodini tiklab oldi, dunyodagi innovatsiyalarni turli sohalarga tatbiq qilish orqali rivojlangan mamlakatlar qatoriga kirdi. O‘ylaymanki, O‘zbekistonga ham Isroil tajribasini joriy qilish orqali turli sohalarda muvaffaqiyatlarga erishish mumkin. Isroillik investorlarni O‘zbekistondagi muayyan soha vakillari bilan hamkorligi, rivojlangan mamlakatlarda ijobiy natijalar bergan texnologiyalarni transfer qilish orqali O‘zbekiston rivojlanishiga hissa qo‘shishga umid qilamiz.
Muzokaralar davomida respublika qishloq xo‘jaligi va sanoatidagi mavjud muammolarni isroillik kompaniya vakillari ishtirokida hal qilish masalalari muhokama qilindi. Xususan, qishloq xo‘jaligi mahsulotlarining unumdorligini, ishlab chiqarish samaradorligini oshirish maqsadida mavjud kamchiliklar, muammolarni aniqlash, ularni tahlil qilish va ularni yechishning qadamma-qadam rejasini ishlab chiqish zaruriyati bugungi kun talabi ekanligi qayd etildi.
Izoh (0)