Исроил ривожланишининг уч устунини Ўзбекистонда татбиқ этиш имкониятлари муҳокама қилинди
Инновацион ривожланиш вазирлигида Исроилнинг ТеcTum компанияси ижрочи директори Ротем Ганс ва Исроил—Ўзбек савдо палатасининг бош директори Сари Цви билан учрашув бўлиб ўтди. Бу ҳақда «Дарё»га вазирлик матбуот хизмати маълум қилди.
Меҳмонларни Инновацион ривожланиш вазири Иброҳим Абдураҳмонов, вазир ўринбосари Йўлбарсхон Мансуров қабул қилди, йиғилишда вазирликнинг бошқа масъул ходимлари ҳам иштирок этди.
ТеcTum компанияси тадбиркорликни ривожлантириш мақсадида кичик ва ўрта бизнес эҳтиёжларини, муаммоларни ва технологик камчиликларни инобатга олган ҳолда муниципал ва маҳаллий шериклар билан ҳамкорлик қилади.
Компания технологик таҳлил ва тадқиқотлардан фойдаланиб, бизнеснинг энг муҳим эҳтиёжларини белгиловчи ўсиш секторларини яратиш учун экотизимнинг энг муҳим иштирокчилари, жумладан, маҳаллий ва федерал ҳукумат вакиллари, нотижорат ташкилотлари билан биргаликда ўз фаолиятини олиб боради.
Кўп йиллар давомида компания Исроил экотизимининг уч устуни — методология, технология, инфратузилмани аниқлаш бўйича тадқиқотлар ўтказиб келмоқда. Эндиликда эса уларни бошқа давлатларга ҳам татбиқ этиш орқали мамлакатлараро муносабатларни янада мустаҳкамлашга киришмоқда.
— Исроил билан Ўзбекистоннинг ўхшаш томонлари бисёр, — деди Ротем Ганс. — Дейлик, бизда ҳам, сизда ҳам сув танқислиги мавжуд. Исроил жуда қисқа муддатда технологиялар орқали ўз иқтисодини тиклаб олди, дунёдаги инновацияларни турли соҳаларга татбиқ қилиш орқали ривожланган мамлакатлар қаторига кирди. Ўйлайманки, Ўзбекистонга ҳам Исроил тажрибасини жорий қилиш орқали турли соҳаларда муваффақиятларга эришиш мумкин. Исроиллик инвесторларни Ўзбекистондаги муайян соҳа вакиллари билан ҳамкорлиги, ривожланган мамлакатларда ижобий натижалар берган технологияларни трансфер қилиш орқали Ўзбекистон ривожланишига ҳисса қўшишга умид қиламиз.
Музокаралар давомида республика қишлоқ хўжалиги ва саноатидаги мавжуд муаммоларни исроиллик компания вакиллари иштирокида ҳал қилиш масалалари муҳокама қилинди. Хусусан, қишлоқ хўжалиги маҳсулотларининг унумдорлигини, ишлаб чиқариш самарадорлигини ошириш мақсадида мавжуд камчиликлар, муаммоларни аниқлаш, уларни таҳлил қилиш ва уларни ечишнинг қадамма-қадам режасини ишлаб чиқиш зарурияти бугунги кун талаби эканлиги қайд этилди.
