“O‘ztransgaz” avtomobillarga gaz to‘ldirish kompressor shoxobchalarida 1 m3 siqilgan tabiiy gaz chakana narxining o‘zgarishi bo‘yicha ma’lumot berdi.
Respublikada siqilgan tabiiy gaz sotish faoliyati bilan shug‘ullanayotgan avtomobillarga gaz to‘ldirish kompressor shoxobchalarida 1 m3 siqilgan tabiiy gazning chakana narxi 2018-yil 31-dekabrga qadar o‘rtacha 1900 so‘mni tashkil etgan bo‘lsa, 2019-yil 1-yanvardan boshlab o‘rtacha 2100 so‘mni tashkil etmoqda.
Shuningdek, soliq konsepsiyasiga hamda O‘zbekiston Respublikasi Prezidentining 2018-yil 26-dekabrdagi PQ-4086-sonli “O‘zbekiston Respublikasining 2019-yilgi asosiy makroiqtisodiy ko‘rsatkichlari prognozi va Davlat budjeti parametrlari hamda 2020—2021-yillarga budjet mo‘ljallari to‘g‘risida”gi qaroriga asosan yiliga 1 mlrd. so‘mdan ortiq tovar aylanmasiga ega bo‘lgan xo‘jalik yurituvchi subyektlar uchun soliq solishning soddalashgan tizimidan (ya’ni, faqat yagona soliq to‘lovchi) umumbelgilangan soliq to‘lash tizimiga o‘tildi.
Umumbelgilangan soliq tizimiga o‘tish jarayonida siqilgan gazning tannarxi qo‘shilgan qiymat solig‘ini hisobga olish mexanizmi mavjudligi sababli pasaydi (yagona soliq tizimida tannarx o‘rtacha – 1 616,0 so‘mni tashkil etgan bo‘lsa, umumbelgilangan soliq tizimida esa tannarx o‘rtacha – 1 287,0 so‘mni tashkil etadi).
Shu bilan birga, soddalashgan soliq tizimida to‘lanadigan soliqlarning jami summasi 390,1 so‘mni tashkil etgan bo‘lsa, umumbelgilangan soliq tizimida to‘lanadigan jami soliqlar 667,3 so‘mni tashkil etadi.
Avtomobillarga gaz to‘ldirish kompressor shoxobchalarida sotilayotgan har bir metr kub siqilgan tabiiy gaz sotishdan olinayotgan o‘rtacha sof foyda miqdori (1 m3 — 27,8 so‘m) o‘zgarmagan.
Yuqoridagilardan ko‘rinib turibdiki, soddalashgan soliq tizimida AGTKShlarda sotiladigan siqilgan gazning iste’molchiga yetkazib beriladigan o‘rtacha narxi 2 006,0 so‘m bo‘lgan bo‘lsa, umumbelgilangan soliqlarni to‘lash tizimiga o‘tilganda 1 954 so‘m atrofida bo‘lishi maqsadga muvofiq.
Shuni ta’kidlab o‘tish joizki, 1 m3 siqilgan gazning iste’molchiga yetkazib beriladigan narxi har bir shoxobchada turlicha bo‘ladi, ya’ni haqiqatda sotiladigan siqilgan gaz hajmidan kelib chiqqan holda bir metr kub siqilgan gazga to‘g‘ri keladigan tannarxi shakllanadi.
Izoh (0)