«Ўзтрансгаз» автомобилларга газ тўлдириш компрессор шохобчаларида сиқилган табиий газ чакана нархининг ўзгариши бўйича маълумот берди

«Ўзтрансгаз» автомобилларга газ тўлдириш компрессор шохобчаларида 1 м³ сиқилган табиий газ чакана нархининг ўзгариши бўйича маълумот берди.

Республикада сиқилган табиий газ сотиш фаолияти билан шуғулланаётган автомобилларга газ тўлдириш компрессор шохобчаларида 1 м³ сиқилган табиий газнинг чакана нархи 2018 йил 31 декабрга қадар ўртача 1900 сўмни ташкил этган бўлса, 2019 йил 1 январдан бошлаб ўртача 2100 сўмни ташкил этмоқда.

Шунингдек, солиқ концепциясига ҳамда Ўзбекистон Республикаси Президентининг 2018 йил 26 декабрдаги ПҚ-4086-сонли «Ўзбекистон Республикасининг 2019 йилги асосий макроиқтисодий кўрсаткичлари прогнози ва Давлат бюджети параметрлари ҳамда 2020—2021 йилларга бюджет мўлжаллари тўғрисида»ги қарорига асосан йилига 1 млрд. сўмдан ортиқ товар айланмасига эга бўлган хўжалик юритувчи субъектлар учун солиқ солишнинг соддалашган тизимидан (яъни, фақат ягона солиқ тўловчи) умумбелгиланган солиқ тўлаш тизимига ўтилди.

Умумбелгиланган солиқ тизимига ўтиш жараёнида сиқилган газнинг таннархи қўшилган қиймат солиғини ҳисобга олиш механизми мавжудлиги сабабли пасайди (ягона солиқ тизимида таннарх ўртача – 1 616,0 сўмни ташкил этган бўлса, умумбелгиланган солиқ тизимида эса таннарх ўртача – 1 287,0 сўмни ташкил этади).

Шу билан бирга, соддалашган солиқ тизимида тўланадиган солиқларнинг жами суммаси 390,1 сўмни ташкил этган бўлса, умумбелгиланган солиқ тизимида тўланадиган жами солиқлар 667,3 сўмни ташкил этади.

Автомобилларга газ тўлдириш компрессор шохобчаларида сотилаётган ҳар бир метр куб сиқилган табиий газ сотишдан олинаётган ўртача соф фойда миқдори (1 м³ — 27,8 сўм) ўзгармаган.

Юқоридагилардан кўриниб турибдики, соддалашган солиқ тизимида АГTКШларда сотиладиган сиқилган газнинг истеъмолчига етказиб бериладиган ўртача нархи 2 006,0 сўм бўлган бўлса, умумбелгиланган солиқларни тўлаш тизимига ўтилганда 1 954 сўм атрофида бўлиши мақсадга мувофиқ.

Шуни таъкидлаб ўтиш жоизки, 1 м³ сиқилган газнинг истеъмолчига етказиб бериладиган нархи ҳар бир шохобчада турлича бўлади, яъни ҳақиқатда сотиладиган сиқилган газ ҳажмидан келиб чиққан ҳолда бир метр куб сиқилган газга тўғри келадиган таннархи шаклланади.