Бухоро шаҳрида ўтказилган меҳнат ярмаркасида таклиф қилинган 500 та бўш иш ўрнига бор-йўғи 20 нафар ёш ишлаш истагини билдирди. Бу ҳақда «Дарё»га Ўзбекистон ёшлар иттифоқи Бухоро вилояти Кенгаши матбуот хизмати раҳбари Зарнигор Нафиддинова маълум қилди.
Ёшлар бандлигини таъминлаш долзарб вазифа эканлигини инобатга олган ҳолда, қатор корхона, ташкилотлар ўз фаолиятини айни шу мақсадга йўналтирган. Бу борада «Бўш иш ўринлари меҳнат ярмаркалари» муҳим вазифани ўтайди.
7 январь куни Бухоро ёшлар марказида ана шундай меҳнат ярмаркаси ўтказилиб, унга иш билан банд бўлмаган, уюшмаган ёшлар ва асосан, бир ойлик муддатли ҳарбий хизматни ўтаб қайтган ёшлар жалб этилди. Бунда 40 та корхона ва ташкилот 500 та бўш иш ўрнини таклиф қилди. Бироқ, натижа қувонарли эмас. Ёшлар 500 та бўш иш ўрнидан атиги 20 тасига истак билдиришди. 45 нафарига эса ишга жойлашиш учун йўлланмалар берилди.
«‘Бўш иш ўринлари’ меҳнат ярмаркалари ўтказиш анъанага кирган. Лекин натижа доимо самарали бўлади, деб айта олмаймиз. Чунки таклиф этилаётган иш ўринлари ёшларга маъқул келса, унинг маоши кўнгилдагидек бўлмаслиги мумкин. Ёки аксинча, меҳнати кўпу маоши оз иш таклифлари ҳам йўқ эмас. Бу эса фуқаронинг турмуши тўкислигини таъминлашда муаммоларга дуч келтириши, табиий. Шу нуқтаи назардан, ёшлар бандлигини таъминлаш мақсадида уларни корхона ва ташкилотларга олиб бориб, иш тартиби ва жамоа билан жойнинг ўзидаёқ таништириб, уларни ишга жойлаштирмоқчимиз», — дейди Ёшлар иттифоқи вилоят Кенгаши бўлим мудири Сардор Раҳимов.
Ярмаркада кўзга ташланган яна бир жиҳат, таклиф этилаётган ишлар олий маълумотли мутахассисларни жалб этишга қаратилган. Ўтказилган меҳнат ярмаркаси эса ўз мақсадига кўра, иш билан банд бўлмаган, уюшмаган ёшлар, шунингдек, муддатли ҳарбий хизматни ўтаб қайтган ёшларга бўш иш ва меҳнат ўринларини таклиф этишга қаратилган. Меҳнат ярмаркалари масъуллари иш ва меҳнат ўринларини таклиф этаётганда ушбу жиҳатларга эътибор қаратмаган кўринади.
Изоҳ (0)