Moliya vazirligi huzuridagi budjetdan tashqari Pensiya jamg‘armasining matbuot xizmatidan ma’lum qilishlaricha, bugungi kunda mamlakatda 118 ming nafardan ziyod ishlovchi pensioner bor. Ularning faqat 40 ming nafari yoki 34 foizi o‘z pensiyalarini to‘liq olishar edi. 78 ming nafardan ortiq yoki 66 foiz ishlovchi pensionerlar bunday imkoniyatdan mahrum bo‘lib, pensiyalarining faqat yarmini, ya’ni 50 foizini olib kelishayotgan edi. Bu haqda O‘zA xabarida aytiladi.
Prezident 2018-yil 12-dekabrda imzolagan farmon bilan joriy yilning 1-yanvaridan boshlab, barcha ishlovchi pensionerlarga pensiyalar to‘liq miqdorda to‘lash to‘g‘risida qaror qabul qilindi.
Bu esa, o‘z navbatida, keksa yoshdagi fuqarolarga pensiyaga chiqqandan keyin ham mamlakatning jamoat va ijtimoiy-iqtisodiy hayotida teng ishtirokini ta’minlashga, yoshlarga o‘zlarining kasbiy mahorati, boy hayotiy va mehnat tajribalarini singdirishga imkoniyat yaratadi. Bundan tashqari, yuqori ish haqi hisobidan pensiyaga chiqqan fuqarolarga munosib pensiya miqdorini belgilash orqali ijtimoiy adolat prinsipini qaror toptirish maqsadida ushbu farmonda pensiyani hisob-kitob qilish uchun ish haqining maksimal miqdorini eng kam oylik ish haqining 8 barobaridan 10 barobarigacha oshirilishi ham belgilandi.
Amaldagi tartibga asosan, yuqori miqdorda oylik ish haqi oluvchi fuqarolarga pensiyani hisoblashda faqat eng kam oylik ish haqining 8 barobarigacha bo‘lgan daromadi inobatga olinib, undan yuqori qismi hisobga olinmas edi.
Misol uchun, o‘rtacha oylik ish haqi - 2200 ming so‘m va ish staji 35 yil bo‘lgan fuqaroga amaldagi tartib bo‘yicha pensiya hisoblashda 1621 ming so‘m (eng kam ish haqining 8 baravari) inobatga olingan (qolgan qismi, ya’ni 579 ming so‘m hisobga olinmagan). Shundan kelib chiqib ushbu summaning 55 foizi, ya’ni pensiyaning tayanch miqdori (891 550 so‘m) belgilanib, talab etiladigan (25 yil)dan ortiqcha ishlagan 10 yilning har bir yili uchun 1 foizdan qo‘shimcha hisoblanib, pensiyaning umumiy miqdori 1 054 ming so‘mni tashkil etar edi.
Yangi tartib bo‘yicha esa, ushbu fuqaroga o‘rtacha oylik ish haqi 1 621 ming so‘m emas, 2 027 ming so‘m (EKIHning 10 baravari) miqdorida hisobga olinadi. Bunda, pensiyaning tayanch miqdori 1 115 ming so‘mni, ortiqcha ishlagan yillar uchun qo‘shimchani hisobga olgan holda pensiyaning umumiy miqdori 1 317 ming so‘mni tashkil etadi yoki 263 ming so‘mga oshadi.
Shuni ta’kidlash kerakki, bu farmon nafaqat 2019-yil 1-yanvardan keyin pensiyaga chiquvchilarga, balki ushbu toifaga tushuvchi hozirgi kunda pensiya olib turgan pensionerlarga ham tatbiq etiladi hamda ularning pensiyalari qayta hisoblab chiqiladi.
Hisob-kitoblarga ko‘ra, 533 ming nafardan ortiqroq pensionerning pensiya miqdorlari o‘rtacha 65 ming so‘mdan 265 ming so‘mgacha oshadi. Buning uchun 2019-yilda 1,8 trillion so‘m miqdorida mablag‘ talab etiladi.
Qayd etish joizki, mazkur xarajatlar kuni kecha Oliy Majlis Senati tasdiqlagan Davlat budjeti, xususan Moliya vazirligi huzuridagi byudjetdan tashqari Pensiya jamg‘armasining 2019-yilgi parametrlarida ko‘zda tutilgan bo‘lib, Davlat budjetidan qo‘shimcha mablag‘ ajratishni talab etmaydi.
Izoh (0)