Qoraqalpog‘istonning Amudaryo tumani Mang‘it shahrida istiqomat qiluvchi Alisher Yo‘ldoshyev eski “Zaporojets” avtomobilining korpusi asosida yangi avtomobil yig‘di. Bu haqda O‘zA xabar berdi.
Antiqa avtomobilni yaratishda Tiko’ning motori, Mazda’ning o‘rindig‘i, Malibu’ning ruli va orqa faralari, Captiva’ning old qoplamasidan foydalanilgan. Ixtirochi avtomobilga “Yagona” deb nom bergan.
Yoshligimdan avtomashina yig‘ishga qiziqaman va ancha vaqt shuni o‘zimga kasb qilib kelganman. Shuning orqasidan pul topib, ro‘zg‘or tebratganman. 90-yillarda Nukus shahrida talabalik paytimda uylarning oldida qantarilib yotgan avtomobillarni ko‘rib, uning egalari bilan gaplashib sotib olardim va ularga qayta ishlov berib sotardim.Hozirgacha davlat ishlaridan bo‘sh paytimda darhol avtomashina yig‘ishga kirishaman. Antiqa avtomobil yaratish g‘oyasi bundan to‘rt yil avval paydo bo‘lgan. Bir kuni avtomobil yig‘ayotganimda yonimga qizcham (u vaqtda 5-sinfda edi) kelib, menga xushomad qilib: ‘dada, menga ham mashina olib bering. Faqat u mashina hech kimda yo‘q, yagona bo‘lsin’ dedi. G‘oyani aslida qizim bergan.
Natijada, mana ko‘rib turibsiz, ‘Yagona’ ‘marka’li avtomobil dunyoga keldi. Xudo xohlasa, kelgusi yilda qizim maktabni tugatadi. Ushbu antiqa avtomobilni qizimga sovg‘a qilmoqchiman.
‘Yagona’ avtomobili uch yilda dunyoga keldi. Mablag‘ topgan paytda bozordan avtomobillarning ehtiyot qismlarini sotib olganman. Mazkur avtomobil uchun 50 million so‘mdan ko‘proq xarajat qilganman.
Alisher Yo‘ldoshyev, ixtirochi
Uning hovlisida “Moskvich—401” rusumli eski avtomobil ham bor ekan. Uni ham bir vaqtlar xarid qilgan bo‘lib, unga qayta ishlov bergan. Ayni paytda avtomobilning motori yaxshi holatda ishlab turibdi.
Alisher Yo‘ldoshyev kelajakda shunday avtomobillardan muzey tashkil qilishni niyat qilgan.
Izoh (0)