Ikki sayyoh vizalaridagi sanalar tufayli O‘zbekistondan chiqarilmadi

5-yanvar kuni O‘zbekiston 100 dan ortiq mamlakatlar uchun vizalar bekor qilinishi va viza rejimi soddalashtirilishi, turizm sohasidagi investorlar uchun misli ko‘rilmagan imtiyozlar haqida ma’lum qilib, qolgan dunyo uchun katta ochiqlik sari ulkan rejalari haqida e’lon qildi, deb yozadi “Gazeta.uz”. Ammo 6-yanvar kuni tizim xorijlik sayyohlar va investorlar ishonchini qozonish uchun vaqt va ancha mehnat talab qilinishini ko‘rsatdi.

Mirzo Ulugbek Innovation Center biznesni rivojlantirish bo‘yicha sobiq direktor o‘rinbosari, tadbirkor Bahodir Ayupov nashrga ma’lum qilishicha, O‘zbekistonga turistlar va potensial investorlar guruhi tarkibida kelgan yosh er-xotin — Germaniya va Italiya fuqarolari elektron vizani olishda yo‘l qo‘yilgan e’tiborsizlik va ularga yordam qilishni istamaslik tufayli Toshkentdan uchib keta olmadi.

Turistlar guruhi orasida O‘zbekistonga 30 million dollar investitsiya kiritish istagidagi tadbirkor, uning qizi va kuyovi ham bo‘lgan.

Ammo ular 5-yanvar kuni Toshkentga yetib kelgach, muammolar boshlangan. Mehmonxonada er-xotinga vizalari muddati 4 va 5-yanvarda tugaganini ma’lum qilishgan.

Ular avvalroq elektron viza uchun ariza berib, O‘zbekistonda bo‘lish sanalarini aniq ko‘rsatgan: 2018-yil 28-dekabrdan 2019-yil 6-yanvargacha. Tizim esa ularga roppa-rosa 90 kunga viza bergan — 6-oktabrdan (ariza berilgan kundan boshlab) 4 va 5-yanvargacha.

Tizim ishlab chiquvchilari O‘zbekistonda bo‘lish davriga to‘g‘ri kelmaydigan davr uchun viza berishdan avtomatik himoyani ko‘zda tutishi kerak edi, deyiladi xabarda.

Qizning otasi — potensial investor tanishlarini ishga solib, vaziyatni hal qilishga uringan, ammo Tashqi ishlar va Ichki ishlar vazirliklariga murojaat orqali ham masala yechilmagan. Investor esa homilador qizi qiyin vaziyatga tushib qolganidan g‘azablanib, bu mamlakatga boshqa qadam bosmasligini, qolgan tanishlarini ham bu haqda ogohlantirishini aytgan.

Er-xotin turistning nafaqat Olmaotagacha, balki undan Nyu-Yorkkacha bo‘lgan chiptalari ham kuyib ketgan. Endi ularning OVIRga borishi, u yerda qoidabuzarlik haqida bayonnoma tuzilib, hujjatlari sudga berilishi, sud ko‘rib chiqib jarima belgilashi kutilmoqda. Shundan keyin ular yangi viza uchun boj to‘lab, IIBga murojaat qiladi va chiqish vizasini oladi.