30-dekabrning asosiy yangiliklari — “Daryo” dayjestida.
Yangi yilda Asaka avtomobil zavodi jamoasi 15 kunga ta’tilga ketadi.
2018-yilning 29-dekabr kuni zavoda 220 minginchi avtomobil — Chevrolet Nexia ishlab chiqarildi. Shu bilan rahbariyat tomonidan yil oxirigacha ishlab chiqarish quvvatini 220 minggacha yetkazish bo‘yicha qo‘yilgan vazifa uddalandi.
***
Olmaotadagi ko‘chaga O‘zbekiston Respublikasining Birinchi Prezidenti Islom Karimov nomi berildi.
Olmaota maslahatining XXXIV navbatdan tashqari sessiyasida 185 ta ko‘chani qayta nomlash ma’qullandi. Qayta nomlangan 183 ko‘chadan 20 tasiga mashhur insonlarning nomlari, qolgan 163 ta ko‘chaga tarixiy-geografik va milliy-ommabop nomlar berildi.
***
Prezidentning “Toshkent—Sharqiy” aerodrom bazasi asosida zamonaviy fuqarolik aviatsiyasi aeroport kompleksini qurish to‘g‘risidagi qaroriga asosan poytaxtda yana bir xalqaro aeroportni qurish ishlari davom etmoqda. Mazkur inshootni qurish “O‘zbekiston temir yo‘llari” aksiyadorlik jamiyatiga yuklatilgan.
Loyihaga ko‘ra, aeroport 2 ta terminaldan iborat bo‘ladi. Dastlabki terminal davlat rahbarlari va rasmiy delegatsiyalarni kutib olish uchun mo‘ljallangan. Bir vaqtning o‘zida 250 nafar yo‘lovchini sig‘dira oladigan navbatdagi terminal yo‘lovchilar bilan birga ishbilarmon va tadbirkorlarga xizmat ko‘rsatadi. Shuningdek, havo kompleksida zamonaviy yuk terminali faoliyati tashkillashtiriladi.
***
Rossiya to‘g‘ridan-to‘g‘ri investitsiyalar fondi, Alibaba Group, Mail.ru va “Megafon”ning elektron tijorat sohasidagi qo‘shma korxonasi 2019-yil boshida ishga tushadi. Bu haqda USM Holdings asoschisi Alisher Usmonov ma’lum qildi.
Milliarderga ko‘ra, kelishuvni yakunlash uchun bir necha shartlar qabul qilinishi lozim edi. Jumladan, texnologik xavfsizlikni Rossiya resurslari hisobidan ta’minlash, shuningdek, Alibaba kompaniyasi texnologiyalaridan Rossiyada foydalanish imkoniyati. Qo‘shma korxona serverlari ham Rossiya hududida bo‘lishi lozim.
***
2018-yil 31-dekabrdan 2019-yil 1-yanvarga o‘tar kechasi soat 00:00 da Toshkentda bayram mushaklari otiladi.
Mushakbozliklar poytaxtning uchta nuqtasida tashkil qilinadi, bular Bunyodkor va Bobur ko‘chalari kesishmasidagi “Xalqlar do‘stligi” maydoni, Bunyodkor ko‘chasi va Kichik halqa yo‘lining “Milliy” stadioni yaqinidagi qismi hamda Yunusobod tumanining 2, 4, 12, 13-dahalari.
Izoh (0)