30 декабрнинг асосий янгиликлари — «Дарё» дайжестида.
Янги йилда Асака автомобиль заводи жамоаси 15 кунга таътилга кетади.
2018 йилнинг 29 декабрь куни завода 220 мингинчи автомобиль — Chevrolet Nexia ишлаб чиқарилди. Шу билан раҳбарият томонидан йил охиригача ишлаб чиқариш қувватини 220 минггача етказиш бўйича қўйилган вазифа уддаланди.
***
Олмаотадаги кўчага Ўзбекистон Республикасининг Биринчи Президенти Ислом Каримов номи берилди.
Олмаота маслаҳатининг XXXIV навбатдан ташқари сессиясида 185 та кўчани қайта номлаш маъқулланди. Қайта номланган 183 кўчадан 20 тасига машҳур инсонларнинг номлари, қолган 163 та кўчага тарихий-географик ва миллий-оммабоп номлар берилди.
***
Президентнинг «Тошкент—Шарқий» аэродром базаси асосида замонавий фуқаролик авиацияси аэропорт комплексини қуриш тўғрисидаги қарорига асосан пойтахтда яна бир халқаро аэропортни қуриш ишлари давом этмоқда. Мазкур иншоотни қуриш «Ўзбекистон темир йўллари» акциядорлик жамиятига юклатилган.
Лойиҳага кўра, аэропорт 2 та терминалдан иборат бўлади. Дастлабки терминал давлат раҳбарлари ва расмий делегацияларни кутиб олиш учун мўлжалланган. Бир вақтнинг ўзида 250 нафар йўловчини сиғдира оладиган навбатдаги терминал йўловчилар билан бирга ишбилармон ва тадбиркорларга хизмат кўрсатади. Шунингдек, ҳаво комплексида замонавий юк терминали фаолияти ташкиллаштирилади.
***
Россия тўғридан-тўғри инвестициялар фонди, Alibaba Group, Mail.ru ва «Мегафон»нинг электрон тижорат соҳасидаги қўшма корхонаси 2019 йил бошида ишга тушади. Бу ҳақда USM Holdings асосчиси Алишер Усмонов маълум қилди.
Миллиардерга кўра, келишувни якунлаш учун бир неча шартлар қабул қилиниши лозим эди. Жумладан, технологик хавфсизликни Россия ресурслари ҳисобидан таъминлаш, шунингдек, Alibaba компанияси технологияларидан Россияда фойдаланиш имконияти. Қўшма корхона серверлари ҳам Россия ҳудудида бўлиши лозим.
***
2018 йил 31 декабрдан 2019 йил 1 январга ўтар кечаси соат 00:00 да Тошкентда байрам мушаклари отилади.
Мушакбозликлар пойтахтнинг учта нуқтасида ташкил қилинади, булар Бунёдкор ва Бобур кўчалари кесишмасидаги «Халқлар дўстлиги» майдони, Бунёдкор кўчаси ва Кичик ҳалқа йўлининг «Миллий» стадиони яқинидаги қисми ҳамда Юнусобод туманининг 2, 4, 12, 13-даҳалари.
Изоҳ (0)