Shimoliy Koreya tuzumiga nisbatan joriy etilgan sanksiyalar KXDRga dori-darmon yetkazishda muammolar tug‘dirmoqda, bu esa mamlakatdagi sog‘liqni saqlash bilan bog‘liq vaziyatga salbiy ta’sir ko‘rsatmoqda. Bu haqda “Interfaks” xabar berdi.
Mahalliy Qizil Xoch jamiyatining bosh kotibi Ri Xo Rimning aytishicha, sog‘liqni saqlash sohasidagi vaziyat juda xavotirli. Sanksiyalarning hayot uchun muhim dori vositalarini yetkazib berishga ta’siri sezilmoqda.
Ta’kidlanishicha, virusga qarshi vositalar, vaksinalar, testlar, tibbiyot xodimlari uchun individual himoya vositalarining yo‘qligi yil boshida mamlakatda kuchli gripp avj olishiga sabab bo‘ldi.
KXDRga qarshi sanksiyalar gumanitar faoliyatni cheklashga qaratilmagan bo‘lsa-da, amaliyotda yetkazib beruvchilarning banklari va yetkazib beruvchilarning o‘zi tomonidan sanksiyalar buzilishidan hayiqish oqibatida yuzaga kelmoqda. Ushbu uzilishlar shundoq ham jabr ko‘rayotgan odamlarga jiddiy ta’sir ko‘rsatmoqda.
Bundan tashqari ayni damda KXDRda 10,3 million kishi oziq-ovqat yetishmovchiligidan aziyat chekadi.
KXDRda shundoq ham jiddiy gumanitar muammolar 2018-yilda jazirama issiq, to‘fon, suv toshqini va sel kelish kabi tabiiy ofatlar oqibatida yanada murakkablashdi.
Koreyalararo munosabatlarning iliqlashishiga qaramay, Shimoliy Koreyaga gumanitar yordam berish yo‘lga qo‘yilmadi.
O‘tgan yili Seul hukumati Shimoliy Koreyaga xalqaro gumanitar tashkilotlar orqali 8 million AQSh dollar miqdorida yordam ko‘rsatish rejasi borligini ma’lum qildi. Ammo ushbu yordam KXDRning denuklearizatsiyasi bo‘yicha muzokaralarda sezilarli natijalarga erishilmagani va kommuntistik tuzumga nisbatan mavjud global sanksiyalar mavjudligi sababli amalga oshirilmadi.
Izoh (0)