Шимолий Корея тузумига нисбатан жорий этилган санкциялар КХДРга дори-дармон етказишда муаммолар туғдирмоқда, бу эса мамлакатдаги соғлиқни сақлаш билан боғлиқ вазиятга салбий таъсир кўрсатмоқда. Бу ҳақда «Интерфакс» хабар берди.
Маҳаллий Қизил Хоч жамиятининг бош котиби Ри Хо Римнинг айтишича, соғлиқни сақлаш соҳасидаги вазият жуда хавотирли. Санкцияларнинг ҳаёт учун муҳим дори воситаларини етказиб беришга таъсири сезилмоқда.
Таъкидланишича, вирусга қарши воситалар, вакциналар, тестлар, тиббиёт ходимлари учун индивидуал ҳимоя воситаларининг йўқлиги йил бошида мамлакатда кучли грипп авж олишига сабаб бўлди.
КХДРга қарши санкциялар гуманитар фаолиятни чеклашга қаратилмаган бўлса-да, амалиётда етказиб берувчиларнинг банклари ва етказиб берувчиларнинг ўзи томонидан санкциялар бузилишидан ҳайиқиш оқибатида юзага келмоқда. Ушбу узилишлар шундоқ ҳам жабр кўраётган одамларга жиддий таъсир кўрсатмоқда.
Бундан ташқари айни дамда КХДРда 10,3 миллион киши озиқ-овқат етишмовчилигидан азият чекади.
КХДРда шундоқ ҳам жиддий гуманитар муаммолар 2018 йилда жазирама иссиқ, тўфон, сув тошқини ва сел келиш каби табиий офатлар оқибатида янада мураккаблашди.
Кореялараро муносабатларнинг илиқлашишига қарамай, Шимолий Кореяга гуманитар ёрдам бериш йўлга қўйилмади.
Ўтган йили Сеул ҳукумати Шимолий Кореяга халқаро гуманитар ташкилотлар орқали 8 миллион АҚШ доллар миқдорида ёрдам кўрсатиш режаси борлигини маълум қилди. Аммо ушбу ёрдам КХДРнинг денуклеаризацияси бўйича музокараларда сезиларли натижаларга эришилмагани ва коммунтистик тузумга нисбатан мавжуд глобал санкциялар мавжудлиги сабабли амалга оширилмади.
Изоҳ (0)