UMS kompaniyasi hukumat mobil aloqasini joriy etish, shuningdek, davlat elektron xizmatlarini ko‘rsatish bo‘yicha ma’lumotlarni qayta ishlash markazini yaratish va rivojlantirish ishlarini boshlaydi, deb yozadi “Gazeta.uz” “O‘zbekiston 24” telekanaliga tayanib.
UMS platformasida loyihaviy boshqaruv yagona milliy axborot tizimi, UzChat messenjeri va davlat sektori uchun blokcheyn-yechimlar yaratiladi. Prezident huzuridagi Loyihaviy boshqaruv milliy agentligi bilan hamkorlikda 2019—2021-yillarga mo‘ljallangan UMS’ni rivojlantirish konsepsiyasini ishlab chiqish boshlangan.
UzChat messenjeri zamonaviy messenjerlarning barcha funksiyalarini o‘z ichiga olgan bo‘lib, guruhli videokonferensiyalarni qo‘llab-quvvatlaydi. Konferensiyada foydalanuvchilarning maksimal soni 256 kishiga yetishi mumkin.
Uzatilayotgan ma’lumotlarning barchasi kriptografik jihatdan himoyalangan va to‘liq maxfiylik bilan ta’minlangan.
Eslatib o‘tamiz, O‘zbekistondagi davlat tashkilotlarida 2019-yil 1-apreldan hukumat mobil aloqasi tizimi joriy etiladi.
Izoh (0)