Surxondaryoda paxta tolasini talon-taroj qilgan shaxslarga nisbatan jinoyat ishi qo‘zg‘atildi

Bosh prokuratura huzuridagi Agrosanoat majmuasi va oziq-ovqat xavfsizligi ta’minlanishi ustidan nazorat qilish inspeksiyasi mutaxassislari tomonidan “Surxondaryo mintaqaviy paxta terminali” MChJda saqlanayotgan va turli yillarda ishlab chiqarilgan tola toylari qayta o‘lchovdan o‘tkazildi. Bu haqda ispeksiya matbuot xizmati “Daryo”ga xabar berdi.

Mazkur jamiyat mahsulot qabul qilish sektori omborchisi J.X. javobgarligidagi “Jarqo‘rg‘on paxta tozalash” AJning 2007, 2011, 2012 va 2013 yillar paxta hosilidan qoldiq bo‘lib kelayotgan 5-nav, oddiy va iflos sinfdagi 285, 286, 312, 217, 187, 188, 409, 203, 204, 206 va 207-markalardagi jami 1343 dona 292,794 tonna konditsion vazndagi toylardan 55, 948 tonna kamomad aniqlandi.

Joriy yil 2-dekabrda paxta mahsulotlarining tahlil natijalari bo‘yicha tuzilgan xulosaga ko‘ra, paxta tolasi emas balki davlat standarti talabidagi “A” va “B” tipdagi paxta momig‘i mavjudligi, ammo tola mahsuloti hamda paxta momig‘i o‘rtasidagi summa ajratilganida, 334 million 820 ming 943 so‘mlik paxta tolasi kamomadiga yo‘l qo‘yilganligi ma’lum bo‘ldi.

Xuddi shunday holat “Sho‘rchi paxta tozalash” AJning 2012, 2013, 2014 va 2016 yillar paxta hosilidan qoldiq bo‘lib kelayotgan 5-nav, oddiy, oddiy, o‘rta va iflos sinfdagi 312, 316, 301, 302, 209, 210 va 122-markadagi jami 960 dona 197, 745 tonna kondinsion vazndagi toylardan 13,387 tonna kamomad aniqlandi. Paxta mahsulotlarining tahlil natijalari bo‘yicha tuzilgan xulosaga ko‘ra, yuqoridagi xolatga o‘xshab paxta tolasi emas balki davlat standarti talabidagi “A” va “B” tipdagi paxta momig‘i mavjud deb topildi. Biroq tola mahsuloti hamda paxta momig‘i o‘rtasidagi summa ajratilganida, 226 million 628 ming 769 so‘mlik paxta tolasi kamomadiga yo‘l qo‘yilganligi oydinlashdi.

“Surxondaryo mintaqaviy paxta terminali” MChJda mahsulot qabul qilish sektori omborchisi A.X javobgarligida bo‘lgan va davlat xarid bahosi 561 million 449 ming 712 so‘mlik ko‘p miqdordagi paxta tolasi talon-toroj bo‘lishiga yo‘l qo‘ygan.

Hozirda mazkur holat yuzasidan moddiy javobgar hisoblangan omborchi A.X. hamda “Jarqo‘rg‘on paxta tozalash” AJ va “Sho‘rchi paxta tozalash” AJ mansabdorlariga Jinoyat kodeksining tegishli bandlari bilan jinoyat ishi qo‘zg‘atilib, tergov harakatlari olib borish uchun viloyat prokuraturasiga yuborildi.