Бош прокуратура ҳузуридаги Агросаноат мажмуаси ва озиқ-овқат хавфсизлиги таъминланиши устидан назорат қилиш инспекцияси мутахассислари томонидан «Сурхондарё минтақавий пахта терминали» МЧЖда сақланаётган ва турли йилларда ишлаб чиқарилган тола тойлари қайта ўлчовдан ўтказилди. Бу ҳақда испексия матбуот хизмати «Дарё»га хабар берди.
Мазкур жамият маҳсулот қабул қилиш сектори омборчиси Ж.Х. жавобгарлигидаги «Жарқўрғон пахта тозалаш» АЖнинг 2007, 2011, 2012 ва 2013 йиллар пахта ҳосилидан қолдиқ бўлиб келаётган 5-нав, оддий ва ифлос синфдаги 285, 286, 312, 217, 187, 188, 409, 203, 204, 206 ва 207-маркалардаги жами 1343 дона 292,794 тонна кондицион вазндаги тойлардан 55, 948 тонна камомад аниқланди.
Жорий йил 2 декабрда пахта маҳсулотларининг таҳлил натижалари бўйича тузилган хулосага кўра, пахта толаси эмас балки давлат стандарти талабидаги «А» ва «B» типдаги пахта момиғи мавжудлиги, аммо тола маҳсулоти ҳамда пахта момиғи ўртасидаги сумма ажратилганида, 334 миллион 820 минг 943 сўмлик пахта толаси камомадига йўл қўйилганлиги маълум бўлди.
Худди шундай ҳолат «Шўрчи пахта тозалаш» АЖнинг 2012, 2013, 2014 ва 2016 йиллар пахта ҳосилидан қолдиқ бўлиб келаётган 5-нав, оддий, оддий, ўрта ва ифлос синфдаги 312, 316, 301, 302, 209, 210 ва 122-маркадаги жами 960 дона 197, 745 тонна кондинсион вазндаги тойлардан 13,387 тонна камомад аниқланди. Пахта маҳсулотларининг таҳлил натижалари бўйича тузилган хулосага кўра, юқоридаги холатга ўхшаб пахта толаси эмас балки давлат стандарти талабидаги «А» ва «B» типдаги пахта момиғи мавжуд деб топилди. Бироқ тола маҳсулоти ҳамда пахта момиғи ўртасидаги сумма ажратилганида, 226 миллион 628 минг 769 сўмлик пахта толаси камомадига йўл қўйилганлиги ойдинлашди.
«Сурхондарё минтақавий пахта терминали» МЧЖда маҳсулот қабул қилиш сектори омборчиси А.Х жавобгарлигида бўлган ва давлат харид баҳоси 561 миллион 449 минг 712 сўмлик кўп миқдордаги пахта толаси талон-торож бўлишига йўл қўйган.
Ҳозирда мазкур ҳолат юзасидан моддий жавобгар ҳисобланган омборчи А.Х. ҳамда «Жарқўрғон пахта тозалаш» АЖ ва «Шўрчи пахта тозалаш» АЖ мансабдорларига Жиноят кодексининг тегишли бандлари билан жиноят иши қўзғатилиб, тергов ҳаракатлари олиб бориш учун вилоят прокуратурасига юборилди.
Изоҳ (0)