Qozog‘istonning Olmaota shahrida buyuk astronom va Movarounnahr hukmdori Mirzo Ulug‘bek hayoti hamda ilmiy merosiga bag‘ishlangan “Mirzo Ulug‘bek. Osmon toqiga qo‘yilgan narvon” hujjatli filmi premyerasi bo‘lib o‘tdi. Bu haqda Islom Karimov fondi Telegram-kanalida xabar berildi.
Ushbu film Karimov Fondining rahbari Lola Karimova-Tillayeva hamda uning turmush o‘rtog‘i Timur Tillayev prodyuserligida suratga olingan.
Kinoasar namoyishi 5—7-dekabr kunlari Temirbek Jurgenov nomidagi Qozog‘iston milliy san’at akademiyasida bo‘lib o‘tgan Markaziy Osiyo hujjatli filmlar forumi doirasida o‘tkazildi.
Forum ishtirokchilari ushbu ijodiy loyihaning ko‘lam-qamrovini alohida qayd etib, mintaqada yashab o‘tgan buyuk tarixiy siymolarning shaxsiyatini teran ochib beruvchi bu kabi filmlarni suratga olish hayotiy zarurat ekanini ta’kidladi. Premyera asnosida kechgan muhokamalarda mutaxassislar Markaziy Osiyo xalqlarining tarixi, madaniyati va an’analari mushtarak ekanini alohida qayd etdi.
– “Mirzo Ulug‘bek. Osmon toqiga qo‘yilgan narvon” hujjatli filmini tomosha qilgach, qalbimda g‘urur va quvonch uyg‘ondi. Mirzo Ulug‘bek – tamaddunimizning bebaho xazinasidir. Sirasini aytganda, ushbu hujjatli film orqali millatning tarixiy qadr-qimmatini anglash mumkin, – deya o‘z taassurotlari bilan bo‘lishdi Qozog‘iston milliy san’at akademiyasi rektori Asxat Mayemirov.
Forum doirasida O‘zbekiston, Tojikiston va Qozog‘iston hujjatli kinoustalari tomonidan suratga olingan 19 ta film namoyish etildi.
– Forum davomida taqdim etilgan filmlar Osiyo mintaqamizning yangi qiyofasi qanday ekanini ko‘rsatadi. Ushbu portretni o‘tmish va bugunni uyg‘unlashtiruvchi, turfa iplardan to‘qilgan yaxlit matoga muqoyasa qilish mumkin. U esa serqirra va serqatlam tariximizni teran idrok etish va undan ibratlanishga undaydi, – deydi Forum tashabbuskori, hujjatli filmlar rejissori Asiya Baygojina.
Izoh (0)