Ijtimoiy tarmoqlarda Samarqand shahridagi hayvonot bog‘ida ichki ishlar organi xodimlari 3 ta sherni otib o‘ldirganligi to‘g‘risida xabarlar tarqaldi. “Daryo” muxbiri Farhod Norbo‘tayev bunga aniqlik kiritdi.
Samarqand shahridagi So‘g‘diyona massivida Farg‘ona viloyatining Bog‘dod tumanidan kelgan “O‘ktam dorboz” xususiy korxonasiga qarashli ko‘chma hayvonot bog‘i 20- oktyabrdan boshlab faoliyat yuritib kelmoqda. Ayni paytda mazkur ko‘chma hayvonot bog‘ida Afrikadan keltirilgan ikkita sher saqlanmoqda.
Namoyish davomda jamoat tartibini saqlash maqsadida 2018-yilning 15 yanvar kuni “O‘ktam dorboz” xususiy korxonasi Samarqand viloyat IIB bilan shartnoma tuzgan, ko‘chma hayvonot bog‘ida xavfsizlik to‘liq ta’minlangan.
Sherlar bo‘yicha tarqalgan xabarlar yuzasidan hayvonot bog‘i xodimi Akmal Mashrabov quyidagicha fikr bildirdi.
– Ijtimoiy tarmoqlardagi fotolar ikki yil oldin olingan. Voqea Samarqand tumanida sodir bo‘lgan. Bilishimcha, “Durbek” ko‘chma hayvonot bog‘idagi sherlar tashqariga chiqib ketgan. Ularni ushlashning iloji bo‘lmaganidan so‘ng so‘nggi chora sifatida o‘ldirilgan. Hayvonot bog‘imizda bunday holat bo‘lmagan. Sherlar otib o‘ldirilganligi to‘g‘risida tarqalgan xabarlardan so‘ng ichki ishlar xodimlari kelib holatni o‘rganib ketdi.
Akmal Mashrabovning aytishicha, ko‘chma hayvonot bog‘idagi Nala va Simba laqabli sherlar mustahkam qo‘riqlanmoqda.
Izoh (0)