ИИБ ходимлари Самарқанддаги ҳайвонот боғида шерларни отиб ўлдиргани ҳақидаги хабарлар тасдиқланмади

Ижтимоий тармоқларда Самарқанд шаҳридаги ҳайвонот боғида ички ишлар органи ходимлари 3 та шерни отиб ўлдирганлиги тўғрисида хабарлар тарқалди. «Дарё» мухбири Фарҳод Норбўтаев бунга аниқлик киритди.

Самарқанд шаҳридаги Сўғдиёна массивида Фарғона вилоятининг Боғдод туманидан келган «Ўктам дорбоз» хусусий корхонасига қарашли кўчма ҳайвонот боғи 20- октябрдан бошлаб фаолият юритиб келмоқда. Айни пайтда мазкур кўчма ҳайвонот боғида Африкадан келтирилган иккита шер сақланмоқда.

Намойиш давомда жамоат тартибини сақлаш мақсадида 2018 йилнинг 15 январь куни «Ўктам дорбоз» хусусий корхонаси Самарқанд вилоят ИИБ билан шартнома тузган, кўчма ҳайвонот боғида хавфсизлик тўлиқ таъминланган.

Шерлар бўйича тарқалган хабарлар юзасидан ҳайвонот боғи ходими Акмал Машрабов қуйидагича фикр билдирди.

– Ижтимоий тармоқлардаги фотолар икки йил олдин олинган. Воқеа Самарқанд туманида содир бўлган. Билишимча, «Дурбек» кўчма ҳайвонот боғидаги шерлар ташқарига чиқиб кетган. Уларни ушлашнинг иложи бўлмаганидан сўнг сўнгги чора сифатида ўлдирилган. Ҳайвонот боғимизда бундай ҳолат бўлмаган. Шерлар отиб ўлдирилганлиги тўғрисида тарқалган хабарлардан сўнг ички ишлар ходимлари келиб ҳолатни ўрганиб кетди.

Акмал Машрабовнинг айтишича, кўчма ҳайвонот боғидаги Нала ва Симба лақабли шерлар мустаҳкам қўриқланмоқда.