“Olmaota—Yekaterinburg” yo‘lida buzilib qolgan avtobusdan 35 nafar o‘zbekistonlik qutqarildi

5-dekabr kuni soat 4.00 atrofida “Olmaota—Yekaterinburg” yo‘lida 51 yo‘lovchini olib ketayotgan avtobus buzilib qolgani haqida xabar olindi. Bu haqda Qozog‘iston IIV Favqulodda vaziyatlar qo‘mitasi ma’lum qildi.

Qo‘mitaga ko‘ra, Qarag‘anda viloyatining “Sarishag‘an” yo‘l tibbiy-qutqaruv punkti xodimlari zudlik bilan qahraton dashtda qolib ketgan odamlar oldiga shoshilgan.

Barcha yo‘lovchilar shifokor ko‘rigidan o‘tkazilgan. 35 yo‘lovchi Sarishag‘an posyolkasidagi temiryo‘l vokzaliga evakuatsiya qilingan, qolgan 16 kishi esa buzilgan avtobus haydovchisi bilan hodisa joyiga yaqin “Aziya Petrol” qahvaxonasida qolgan.

Mazkur yo‘lovchilarning 35 nafari o‘zbekistonlik ekanligi bildirilmoqda. Ularning keyingi taqdiri noma’lum. Katta ehtimol bilan avtobus sozlangan va ular o‘z manziliga yetib olgan.