“Made in Uzbekistan” birinchi хalqaro ko‘rgazma-yarmarkasida 1000 dan ortiq uy-ro‘zg‘or buyumlari namoyish etildi

27—30-noyabr kunlari Toshkentda O‘zbekiston Respublikasi Tashqi savdo vazirligining tashabbusi bilan “O‘zekspomarkaz” MKM bilan hamkorlikda “Made in Uzbekistan” birinchi Xalqaro eksport ko‘rgazma-yarmarkasi bo‘lib o‘tdi, deb xabar berdi Tashqi savdo vazirligi axborot xizmati.

Ikkita pavilyonda, shuningdek, 5000 metr kvadrat maydonda joylashgan “O‘zekspomarkaz” MKM ochiq maydonchasida 1000 dan ortiq turdagi uy-ro‘zg‘or buyumlari namoyish etildi. O‘zbekistonda 150 ga yaqin korxona xorijiy mehmonlarga o‘z salohiyatlarini namoyish etish imkoniyatiga ega bo‘ldi. To‘rt kun mobaynida ushbu yarmarkada Markaziy Osiyo, Afg‘oniston, Rossiya, Belarus, Ozarbayjon, Chexiya, Xitoy, Hindiston, Koreya Respublikasi, Avstraliya va boshqa mamlakatlardan tashrif buyurgan ishbilarmon doiralar va xaridorlarining 800 nafardan ortiq vakillari ishtirok etdi.

“O‘zbekistonning rivojlanish dinamikasini aks ettiradigan juda qiziqarli ko‘rgazma. Eng muhimi, qamrov va shaffoflik yoqdi: mahalliy ishlab chiqarishning barcha sohalari namoyish etilib, ishlab chiqarish korxonalariga tashriflar tashkil etildi. Alohida ta’kidlash joziki, sanoat korxonalarida ishlab chiqarish jarayonlari yaxshi tashkil etilganligi tayyor mahsulotning yuqori sifatli bo‘lishini ta’minlaydi”, – deb sharhladi ko‘rgazma ishtirokchisi germaniyalik Piter Rodxe.

Mehmonlarga yuqori sifatli mahsulotlarning keng nomeklaturasi bilan tanishish, shuningdek, O‘zbekistondan tovarlarni yetkazib berish bo‘yicha shartnomalar va bitimlar tuzish imkoniyati berildi.

Ko‘rgazma yakunida faol ishtirokchilarga esdalik sovg‘alari va sertifikatlar topshirildi. Ishtirokchilar quyidagi yo‘nalishlar bo‘yicha taqdirlandi:

• Eng innovatsion stend – “Daiichi” kompaniyasi;
• Eng ko‘p tashrif buyurilgan stend – “Uzcharmsanoat” uyushmasi;
• Eng ma’lumotga boy stend – “O‘zbekneftegaz” AJ;
• Eng ko‘p mahsulotga ega stend – “Artel Engineering and Management” MChJ;