Bugungi kunda xalqaro hamkorliklar doirasida xorijiy ommaviy axborot vositalari vakillari O‘zbekistonda olib borilayotgan tub islohotlarga katta qiziqish bilan qaramoqda, deb xabar beradi IIV Jamoatchilik va ommaviy axborot vositalari bilan aloqalar boshqarmasi.
Shuningdek, O‘zbekistonda inson huquqlarini himoya qilish masalasi, shu jumladan, xavfsizlikni ta’minlash, terrorizm va ekstremizmga qarshi kurashish borasida olib borilayotgan ishlar ham xorijliklar diqqatidadir.
Shu kunlarda Shvetsiyaning “TV 4” telekanali muxbiri Tereza Kristianssonning O‘zbekistonga tashrifidan ham ko‘zlangan maqsad, aynan mamlakatda bu borada amalga oshirilgan ishlarni yoritishdir.
Bugun Ichki ishlar vazirligida xorijiy muxbir bilan Vazirlik Jamoatchilik va ommaviy axborot vositalari bilan aloqalar boshqarmasi boshlig‘i Qutbiddin Burxonov hamda Terrorizm va ekstremizmga qarshi kurashish bosh boshqarmasi mas’ul xodimi Dilmurod Muhitdinovlar ishtirokida uchrashuv o‘tkazildi. Qutbiddin Burxonov mamlakatda ichki ishlar organlari tomonidan olib borilayotgan ishlar, tizimda o‘tkazilgan islohotlar bilan mehmonlarni tanishtirdi.
Shuningdek, Dilmurod Muhitdinov adashib turli ektremistik oqimlarga kirib qolgan fuqarolarimizni bir qanchasi afv etilgani va ular maxsus ro‘yxatdan chiqarilib, sog‘lom turmush kechirishlari uchun munosib sharoitlar bilan ta’minlanganini qayd qildi.
Uchrashuvdan so‘ng Tereza Kristiansson ilgari chet mamlakatlardagi harbiy to‘qnashuvlarda qatnashib, O‘zbekistonga qaytarilgan fuqarolar bilan suhbatlashdi.
Tashrif doirasida mehmonlar O‘zbekistonda boshqa soha vakillari bilan uchrashishlari rejalashtirilgan.
Izoh (0)