“Istanbul—Samarqand” reysi yo‘lovchisi “Yashil yo‘lak”dan olib o‘tmoqchi bo‘lgan 100 dona uzuk va sirg‘a to‘xtatib qolindi

Samarqand xalqaro aeroportiga “Istanbul—Samarqand” reysi bilan uchib kelgan D.M. “Yashil yo‘lak” orqali kumushdan yasalgan, umumiy vazni 336,7 gramm bo‘lgan 100 dona uzuk va sirg‘alarni yashirincha olib kirmoqchi bo‘lganligi aniqlandi. Bu haqda “Daryo”ga Bojxona qo‘mitasi axborot xizmati ma’lum qildi.

Aniqlangan holat yuzasidan bojxona xodimlari tomonidan xolislar ishtirokida ma’muriy huquqbuzarlik to‘g‘risidagi bayonnoma rasmiylashtirildi.

Samarqand viloyat ma’muriy sudi tomonidan unga nisbatan Ma’muriy javobgarlik to‘g‘risidagi kodeksning 33-moddasi qo‘llanib, eng kam oylik ish haqining ikki baravari miqdorida jarima jazosi tayinladi. Jami bahosi 8,4 million so‘mlik kumushdan yasalgan taqinchoqlar tegishli tartibda davlat foydasiga musodara qilindi.

Ma’lumot uchun, joriy yil davomida Samarqand viloyat bojxona boshqarmasi xodimlari tomonidan umumiy qiymati 420 million so‘mlik, og‘irligi 2,7 kilogrammdan ortiq zargarlik buyumlarining noqonuniy olib o‘tilishiga chek qo‘yilgan.

Amaldagi tartiblarga ko‘ra, jismoniy shaxslar vazni 65 grammgacha bo‘lgan zargarlik buyumlarini shaxsiy ehtiyoji uchun bojsiz olib kirishi mumkin.