Самарқанд халқаро аэропортига «Истанбул—Самарқанд» рейси билан учиб келган Д.М. «Яшил йўлак» орқали кумушдан ясалган, умумий вазни 336,7 грамм бўлган 100 дона узук ва сирғаларни яширинча олиб кирмоқчи бўлганлиги аниқланди. Бу ҳақда «Дарё»га Божхона қўмитаси ахборот хизмати маълум қилди.
Аниқланган ҳолат юзасидан божхона ходимлари томонидан холислар иштирокида маъмурий ҳуқуқбузарлик тўғрисидаги баённома расмийлаштирилди.
Самарқанд вилоят маъмурий суди томонидан унга нисбатан Маъмурий жавобгарлик тўғрисидаги кодекснинг 33-моддаси қўлланиб, энг кам ойлик иш ҳақининг икки баравари миқдорида жарима жазоси тайинлади. Жами баҳоси 8,4 миллион сўмлик кумушдан ясалган тақинчоқлар тегишли тартибда давлат фойдасига мусодара қилинди.
Маълумот учун, жорий йил давомида Самарқанд вилоят божхона бошқармаси ходимлари томонидан умумий қиймати 420 миллион сўмлик, оғирлиги 2,7 килограммдан ортиқ заргарлик буюмларининг ноқонуний олиб ўтилишига чек қўйилган.
Амалдаги тартибларга кўра, жисмоний шахслар вазни 65 граммгача бўлган заргарлик буюмларини шахсий эҳтиёжи учун божсиз олиб кириши мумкин.
Изоҳ (0)