Avval xabar berganimizdek, PROlogue xalqaro kinofestivali doirasida “Yoshlar ijod saroyi”da “O‘zbek kinosi tarixi” fotoko‘rgazmasi ochilndi. Bu haqda “Daryo”ga Yoshlar media markazi ma’lum qildi.
Ko‘rgazmada “O‘lim minorasi”, “Ikkinchi xotin”, “Qasam”, “Boy ila xizmachi”, “Mahallada duv-duv gap”, “Toshkent – non shahri”, “Shum bola”, “Yettinchi o‘q”, “Siz kimsiz?”, “Kelinlar qo‘zg‘oloni”, “Vatan”, “Sabot” va boshqa bir qator milliy filmlarning suratlarga muhrlangan lahzalari aks etgan.
—Fotoko‘rgazmani ko‘rib, o‘zbek kinosiga tamal toshini qo‘yib ketgan buyuk san’atkorlar, ustozlarni yana bir bor esladik. Bu filmlarning hammasi o‘zbek kinosining oltin fondini tashkil qiladi, yoshlar tarbiyasida ham alohida o‘rin tutadi. Bugungi festival faqat san’atkorlarniki emas, butun xalqniki, yoshlarniki, tomoshabinlarniki. Chunki festival doirasida ko‘plab to‘liq va qisqa metrajli fil’mlar namoyish etiladi, — dedi O‘zbekiston xalq artisti Yodgor Sa’diyev.
Ko‘rgazma zaliga monitorlar o‘rnatilib, unda fotosuratlar 3D formatida namoyish etildi.
Fotoko‘rgazma 29-noyabrga qadar davom etadi.
Izoh (0)