Qozog‘istonning Olmaota shahrida bo‘lib o‘tgan xalqaro kinofestivalda o‘zbek aktrisasi Feruza Saidova “Eng yaxshi ayol roli uchun” nominatsiyasida g‘olib bo‘ldi. Bu haqda “O‘zbekkino” matbuot kotibi Azizbek Qurbonovga tayanib, Turon24 ma’lum qildi.
“Qozog‘istonning Olmaota shahrida bo‘lib o‘tgan Shaken Aymanov nomidagi xalqaro kinofestivalda Zulfiqor Musoqovning ”Dadam betob“ filmi ishtirok etdi. Festival yakuniy natijalariga ko‘ra, filmda bosh rolni ijro etgan o‘zbek aktrisasi Feruza Saidova “Eng yaxshi ayol roli uchun” nominatsiyasida g‘olib bo‘ldi. Biz juda xursandmiz. Mahoratli aktrisaga mukofotni “Berlin oqqo‘rg‘on” filmi taqdimot marosimida topshirish reja qilinmoqda. Festivalda O‘zbekiston nomidan ishtirok etgan barcha kinoijodkorlarni g‘alaba bilan tabriklaymiz“, – dedi Azizbek Qurbonov Turon24 bilan suhbatda.
Zulfiqor Musoqovning “Dadam betob” badiiy filmining Toshkentdagi ilk premyerasi 2017-yil yanvar oyida bo‘lib o‘tgan.
Film sabr-toqat, matonat haqida hikoya qiladi. Kartinada bugungi ijtimoiy muammolar, hayotiy qarama-qarshiliklar ifoda etilgan. Og‘ir xastalikka uchragan turmush o‘rtog‘ini oyoqqa turg‘azish uchun shaharga kelib, kirakashlik qilgan Aziza, hayotda ko‘p bor nohaqliklarning qurboniga aylanib, oxir-oqibat jinoyat ko‘chasiga kirib qolgan Pokiza kabi obrazlarning taqdiri misolida hayotiy muammolar ochib berilgan.
Filmda asosiy rollarni Feruza Saidova (Aziza), Yulduz Rajabova (Pokiza), Farhod Abdullayevlar (tergovchi) ijro etgan.
Izoh (0)