Қозоғистоннинг Олмаота шаҳрида бўлиб ўтган халқаро кинофестивалда ўзбек актрисаси Феруза Саидова «Энг яхши аёл роли учун» номинациясида ғолиб бўлди. Бу ҳақда «Ўзбеккино» матбуот котиби Азизбек Қурбоновга таяниб, Turon24 маълум қилди.
«Қозоғистоннинг Олмаота шаҳрида бўлиб ўтган Шакен Айманов номидаги халқаро кинофестивалда Зулфиқор Мусоқовнинг »Дадам бетоб« фильми иштирок этди. Фестиваль якуний натижаларига кўра, фильмда бош ролни ижро этган ўзбек актрисаси Феруза Саидова «Энг яхши аёл роли учун» номинациясида ғолиб бўлди. Биз жуда хурсандмиз. Маҳоратли актрисага мукофотни «Берлин оққўрғон» фильми тақдимот маросимида топшириш режа қилинмоқда. Фестивальда Ўзбекистон номидан иштирок этган барча киноижодкорларни ғалаба билан табриклаймиз«, – деди Азизбек Қурбонов Turon24 билан суҳбатда.
Зулфиқор Мусоқовнинг «Дадам бетоб» бадиий фильмининг Тошкентдаги илк премьераси 2017 йил январь ойида бўлиб ўтган.
Фильм сабр-тоқат, матонат ҳақида ҳикоя қилади. Картинада бугунги ижтимоий муаммолар, ҳаётий қарама-қаршиликлар ифода этилган. Оғир хасталикка учраган турмуш ўртоғини оёққа турғазиш учун шаҳарга келиб, киракашлик қилган Азиза, ҳаётда кўп бор ноҳақликларнинг қурбонига айланиб, охир-оқибат жиноят кўчасига кириб қолган Покиза каби образларнинг тақдири мисолида ҳаётий муаммолар очиб берилган.
Фильмда асосий ролларни Феруза Саидова (Азиза), Юлдуз Ражабова (Покиза), Фарҳод Абдуллаевлар (терговчи) ижро этган.
Изоҳ (0)