Yevropa komissiyasi 21-noyabr kuni Italiyaning 2019-yil uchun qayta ishlangan budjet rejasini qat’iyan rad etdi. Bu qadam defitsitning kelishilgan parametrlaridan chiqib ketilganlik bilan izohlanmoqda, deb yozadi “Korrespondent.net”.
Yevropa Ittifoqining me’yoriy hujjatlariga ko‘ra, davlat qarzi YaIMning 60 foizidan oshib ketmasligi kerak. Italiyaning populistik hukumati budjet loyihasiga 2,3 trillion yevro miqdoridagi davlat qarzini kiritgan, bu summa YaIMning 130 foizini tashkil qiladi.
Rejalashtirilayotgan xarajatlar hisobiga hukumat nafaqa yoshini pasaytirishni, soliq yukini kamaytirishni va nemis namunasi bo‘yicha ishsizlar uchun ijtinoiy kafolatni joriy qilishni ko‘zlamoqda.
Iqtisodiy masalalar bo‘yicha yevrokomissar Valdis Dombrovskisning fikricha, Italiya o‘z muammolarini kelgusi kreditlar hisobiga yechishni rejalashtirmoqda va taklif qilingan loyiha mamlakatdagi iqtisodiy vaziyatda o‘zining salbiy aksini topadi.
Bryussel Italiyaga qarshi rasmiy tekshiruv boshlash bilan tahdid qildi. Rimga ko‘p milliardli jarimalar bilan tahdid qiluvchi qarorni Ittifoq mamlakatlarining moliya vazirlari qabul qilishi kerak.
Izoh (0)