Har to‘rtinchi yevropalik populistlar uchun ovoz berishi ma’lum bo‘ldi

So‘nggi 20 yil ichida Yevropada populistlar (ijtimoiy jozibador g‘oyalar orqali xalqqa yoqish, uning ishonchini qozonishga intiluvchi siyosatchilar) partiyasini qo‘llab-quuvatlash darajasi uch martadan ko‘proq o‘sdi, deb yozadi “Korrespondent.net”. Bu ularning yetakchilari 11 mamlakatda hukumat mansablarini egallashi uchun yetarli bo‘ldi.

The Guardian 30 dan ortiq yetakchi siyosatshunoslar bilan hamkorlikda olib borgan tadqiqotga ko‘ra, so‘nggi 20 yil mobaynida Yevropaning 31 mamlakatidagi milliy saylovlar natijalarining tahlili Yevropa populistlar partiyalari, ayniqsa o‘ng populistlar partiyalarini qo‘llab-quvvatlash darajasi oshganligini ko‘rsatgan.

Bundan atigi 20 yil avval populistlar partiyalari asosan marginal (oraliq) kuch bo‘lgan va butun qit’a bo‘yicha ovozlarning bor-yo‘g‘i 7 foizini tashkil qilgan. So‘nggi milliy saylovlarda esa yevropaliklar har to‘rtinchi ovozni populistlar partiyalariga bergan.

Shuningdek, ta’kidlanishicha, Yevroparlamentning navbatdagi chaqirig‘ida populistlar har qachongidan ko‘proq bo‘ladi.