O‘zbekistondagi avtomobillarga gaz quyish kompressor stansiyalari tomonidan realizatsiya qilinayotgan tabiiy gaz narxi shu yil 16 noyabridan 300-400 so‘mga qimmatladi (1700-1800 so‘mdan 2000-2200 so‘mgacha). Bu haqda o‘tkazilgan tahlil natijalariga tayanib, Moliya vazirligi ma’lum qildi.
Vazirlik avtomobillarga gaz quyish kompressor stansiyalari orqali realizatsiya qilinayotgan tabiiy gaz narxini oshirishga asos yo‘qligini ma’lum qildi.
2018-yil 16-noyabrga qadar gaz quyish shoxobchalariga yetkazib berilayotgan 1 kubometr tabiiy gazning narxi 789 so‘m 74 tiyinni (buning 289,74 tiyini tabiiy gazning ulgurji sotish narxi, 500 so‘mi maxsus investitsiya ustama haqi) tashkil etgan. 16-noyabrdan boshlab 1 kubometr tabiiy gaz narxi 800 so‘m etib belgilangan, 500 so‘m miqdoridagi maxsus investitsiya ustama haqi bekor qilingan va ushbu narxga qo‘shilgan.
Moliya vazirligi gaz quyish shoxobchalari tomonidan narxning 17 foizga oshirilishini asossiz, deb biladi va narxlar 15-noyabrgacha bo‘lgan holatga qaytmasa, tegishli sanksiyalarni qo‘llashga majbur bo‘ladi. Transport vositalari uchun benzin, dizel yonilg‘isi va gaz iste’moli uchun soliq stavkasini ko‘paytirish orqali noqonuniy yo‘l bilan olinayotgan daromadlarni olib qo‘yish taklifi bilan chiqisha yoki boshqa fiskal choralarni ko‘rish shular jumlasidandir.
Hozirgi paytda Raqobat qo‘mitasi, “O‘zdavneftgazinspeksiyasi” va davlat soliq xizmati organlariga qonunchilikda belgilangan tartibda nohalol raqobat faktlarini aniqlash maqsadida avtomobillarga gaz quyish shoxobchalaridagi narxlar ustidan qat’iy nazorat o‘rnatish bo‘yicha topshiriq berilgan.
Izoh (0)