Sirdaryoda o‘tkazilayotgan profilaktika tadbirlari natijasida sodir etilgan jinoyatlar soni 55 taga kamaydi

Sirdaryo viloyatida o‘tkazilayotgan profilaktika tadbirlari jinoyatchilik va huquqbuzarliklarning oldini olish, ularni keltirib chiqaruvchi sabablarni o‘rganishda muhim ahamiyat kasb etmoqda, deb yozadi O‘zA.

Buni Sayxunobod tumanida amalga oshirilayotgan ishlar misolida ham ko‘rish mumkin. Tumanda ichki ishlar idoralari va jamoatchilik o‘rtasida yaxshi hamkorlik aloqalari yo‘lga qo‘yilgan. Olib borilayotgan sa’y-harakatlar natijasida o‘tgan yilning shu davriga nisbatan hududda sodir etilgan jinoyatlar soni 55 taga kamaygan. Profilaktik hisobda turuvchi shaxslar o‘tgan yilning shu davriga nisbatan kamaygan, biroq, sudlanganlar soni ko‘paygan.

Tumanda yetti nafar xotin-qiz tomonidan jinoyat sodir etilgani achinarlidir. Jinoyatchilikka qo‘l urgan bu ayollardan to‘rt nafari taqiqlangan giyohvand o‘simlik yetishtirgan, bir nafari taqiqlangan giyohvand o‘simlikni uyida saqlagan va ikki nafari hujjatlarni soxtalashtirish jinoyatini sodir etgan.

“Sodir etilgan jinoyatlarni fosh etishdan, uning oldini olish, kelib chiqish sabablarini atroflicha o‘rganish, keng jamoatchilik orasida muhokama etish ko‘proq samara berishi amalda isbotini ko‘rsatmoqda, — deydi tuman ichki ishlar bo‘limi boshlig‘i, moyor Jasur Soibov. — Shu o‘rinda bir misol. Joriy yilning 1-sentabr kuni to‘yda ko‘p miqdorda iste’mol qilingan spirtli ichimlik ta’sirida ‘Ittifoq’ mahallasida istiqomat qiluvchi 1987-yilda tug‘ilgan fuqaro D.Q. o‘z mahalladoshi 1980-yilda tug‘ilgan A.S. bilan gap talashadi. Tortishuv mushtlashuv bilan yakun topadi. Oqibatda D.Q. tan jarohati olib, tuman tibbiyot birlashmasining travmatologiya bo‘limida davolanib chiqadi. Ushbu hodisa mahalla fuqarolar yig‘inining umumiy ochiq yig‘ilishida gumondor hamda jabrlanuvchining oila a’zolari, qarindosh-urug‘lari, mahalladoshlari va keng jamoatchilik o‘rtasida atroflicha muhokama qilindi”.

Har ikki shaxsning o‘z ayblariga iqrorligi inobatga olinib, jabrlanuvchi D.Q. mahalla fuqarolar yig‘ini va hududdagi profilaktika inspektorining nazoratiga olindi. A.S. ga nisbatan tegishli tartibda jinoyat ishi qo‘zg‘atildi.