Сирдарё вилоятида ўтказилаётган профилактика тадбирлари жиноятчилик ва ҳуқуқбузарликларнинг олдини олиш, уларни келтириб чиқарувчи сабабларни ўрганишда муҳим аҳамият касб этмоқда, деб ёзади ЎзА.

Буни Сайхунобод туманида амалга оширилаётган ишлар мисолида ҳам кўриш мумкин. Туманда ички ишлар идоралари ва жамоатчилик ўртасида яхши ҳамкорлик алоқалари йўлга қўйилган. Олиб борилаётган саъй-ҳаракатлар натижасида ўтган йилнинг шу даврига нисбатан ҳудудда содир этилган жиноятлар сони 55 тага камайган. Профилактик ҳисобда турувчи шахслар ўтган йилнинг шу даврига нисбатан камайган, бироқ, судланганлар сони кўпайган.

Туманда етти нафар хотин-қиз томонидан жиноят содир этилгани ачинарлидир. Жиноятчиликка қўл урган бу аёллардан тўрт нафари тақиқланган гиёҳванд ўсимлик етиштирган, бир нафари тақиқланган гиёҳванд ўсимликни уйида сақлаган ва икки нафари ҳужжатларни сохталаштириш жиноятини содир этган.

«Содир этилган жиноятларни фош этишдан, унинг олдини олиш, келиб чиқиш сабабларини атрофлича ўрганиш, кенг жамоатчилик орасида муҳокама этиш кўпроқ самара бериши амалда исботини кўрсатмоқда, — дейди туман ички ишлар бўлими бошлиғи, моёр Жасур Соибов. — Шу ўринда бир мисол. Жорий йилнинг 1 сентябрь куни тўйда кўп миқдорда истеъмол қилинган спиртли ичимлик таъсирида ‘Иттифоқ’ маҳалласида истиқомат қилувчи 1987 йилда туғилган фуқаро Д.Қ. ўз маҳалладоши 1980 йилда туғилган А.С. билан гап талашади. Тортишув муштлашув билан якун топади. Оқибатда Д.Қ. тан жароҳати олиб, туман тиббиёт бирлашмасининг травматология бўлимида даволаниб чиқади. Ушбу ҳодиса маҳалла фуқаролар йиғинининг умумий очиқ йиғилишида гумондор ҳамда жабрланувчининг оила аъзолари, қариндош-уруғлари, маҳалладошлари ва кенг жамоатчилик ўртасида атрофлича муҳокама қилинди».

Ҳар икки шахснинг ўз айбларига иқрорлиги инобатга олиниб, жабрланувчи Д.Қ. маҳалла фуқаролар йиғини ва ҳудуддаги профилактика инспекторининг назоратига олинди. А.С. га нисбатан тегишли тартибда жиноят иши қўзғатилди.