Toshkentda 19—21-noyabr kunlari Turizm sohasidagi birinchi xalqaro investitsiyaviy forum bo‘lib o‘tadi. Bu haqda O‘zA xabar bermoqda.
O‘zbekiston Respublikasi Turizmni rivojlantirish davlat qo‘mitasi tomonidan Tashqi savdo vazirligi, Savdo-sanoat palatasi hamkorligida tashkil qilinadigan forumda mamlakat va xorijiy davlatlarning sayyohlik bo‘yicha firma va kompaniyalari, mehmonxonalar mutaxassislari, diplomatik korpus, xizmat ko‘rsatish sohasi vakillari, dunyoning jami 30 mamlakatidan vakillar ishtirok etishi kutilmoqda.
Turizm sohasi u bilan bog‘liq barcha infratuzilmani rivojlantirishga (transport, ijtimoiy xizmatlar kabi) bevosita ta’sir ko‘rsatadi. Bu esa sayyohlik tarmog‘ini iqtisodiyotning yuqori daromadli sohasiga aylantiradi.
Poytaxtdagi “O‘zekspomarkaz“ milliy ko‘rgazmalar majmuasida tashkil qilinadigan Turizm sohasidagi birinchi xalqaro investitsiyaviy forum mamlakatda turizmni rivojlantirish yo‘nalishidagi hamkorlikni kengaytirish, to‘g‘ridan-to‘g‘ri xorijiy kapital qo‘yilmasini, shuningdek, mamlakatning sayyohlik jozibadorligini yanada oshirish kabi maqsadlarni ro‘yobga chiqarishga xizmat qiladi.
Forum doirasida Yevropa va Markaziy Osiyo davlatlari sarmoyadorlari, xalqaro moliya institutlari, turizm sohasidagi tashkilotlar, mamlakat va chet el kompaniyalari rahbarlari tomonidan 100 dan ziyod sarmoyaviy loyihalar taqdimoti o‘tkaziladi.
Xalqaro anjuman dasturida Surxondaryo viloyatidagi sayyohlik imkoniyatlariga bag‘ishlab o‘tkaziladigan matbuot anjumani, shuningdek, mamlakat hududlarida turizm loyihalarini amalga oshirish imkoniyatlariga bag‘ishlangan tanishuv safarlariga keng o‘rin berilgan.
Forum natijalari bo‘yicha investorlar va turizm sektori vakillari o‘rtasida hamkorlikka oid qator bitim va kelishuvlar imzolanishi kutilmoqda.
Izoh (0)