YouTube’dagi The Beatles kanalida Back in the U.S.S.R. qo‘shig‘iga ishlangan yangi klip paydo bo‘ldi, deb yozmoqda Meduza.
Qo‘shiq va videoning syujetiga ko‘ra, guruh SSSRga keladi, aslida esa bu hech qachon yuz bermagan. Rolik asosan sovet davri filmlarining kadrlaridan tashkil topgan. Xususan, rolikda Moskvadagi Qizil maydonni, Stalin ko‘p qavatli binolarini ko‘rish mumkin.
Rolik The Beatles guruhining 1968-yilda taqdim etilgan albomining 50 yilligi munosabati bilan chiqarilgan. Back in the U.S.S.R. qo‘shig‘i mazkur albomni ochib bergan.
Avvalroq guruhning mazkur albomdan joy olgan Glass Onion qo‘shig‘iga olingan klipi taqdim etilgan edi.
Joriy yilning 9-noyabrda albomning yubileyi munosabati bilan u qayta taqdim etiladi.
The Beatles guruhiga 1960-yilda asos solingan. Uning tarkibida Jon Lennon, Pol Makkartni, Jorj Xarrison va Ringo Starr ijro etgan. Shuningdek, jamoaga turli vaqtlarda Styuart Satkliff, Pit Best va Jimmi Nikol qo‘shilgan. Guruh jami 13 ta studiya albomini taqdim etgan.
Rolling Stone jurnali The Beatles a’zolarini barcha davrlarning eng buyuk ijrochilari deb tan olgan. Jamoa 1970-yilda birgalikdagi faoliyatni to‘xtatgan.
Izoh (0)