Qashqadaryo viloyatining Qamashi tumanida mavjud 89 ta umumta’lim maktabiga 1312 tonna briket nam holatda yetkazib berilmoqda. Natijada mazkur yoqilg‘i mahsuloti 200-300 kilogramm kam chiqayapti. Bu haqda Turon24 ga tumandagi 58-umumta’lim maktabi direktorining xo‘jalik ishlari bo‘yicha o‘rinbosari Hamidulla Ergashev ma’lum qildi.
“Tumanda maktablarning barchasi briket va ko‘mir bilan isitiladi, — deydi tuman xalq ta’limi bo‘limi mudiri Shavkat Bekmirzayev. — Ta’lim muassasalarida mavjud 502 ta qozonxonaning 11 tasi mutlaqo talabga javob bermaydi. Hozir ushbu qozonxonalar qayta ta’mirlanmoqda”.
Joriy kuz-qish mavsumi uchun tumandagi umumta’lim maktablariga 1819 tonna yoqilg‘i (shundan 507 tonnasi ko‘mir, 1312 tonnasi briket) yetkazib berilishi mo‘ljallangan. Bugunga qadar 1670 tonna yoqilg‘i mahsuloti bilim dargohlariga yetkazib berilgan. Faqat 140 tonna briket hali o‘z egalariga topshirilmagan.
“Maktabimiz 800 xaltadan ortiq jami 20 tonna briket bilan ta’minlangan. Kecha keltirganimiz juda nam holatda edi, — deydi tumandagi 58-maktab direktorining xo‘jalik ishlari bo‘yicha o‘rinbosari Hamidulla Ergashev. — Briket nam bo‘lgach, kilogrammdan yutqazamiz. Nam briketni olmaylik desak, avtomashina buyurtma qilib borganmiz. Quruq qo‘l bilan qaytsak, pulimizga kuyamiz. Shuning uchun majbur olib kelaverdik. Agar bizga keltirilgan xaltalar sonini 800 ta deb hisoblasak, har biridan 2-3 kilogramm kamaysa, qancha yoqilg‘i yo‘qqa chiqishini hisoblayvering”.
“Bu yil qish mavsumi uchun berilayotgan ko‘mir sifati juda yomon, — deydi 15-maktab direktori Zohid Ravshanov. — Men yo‘q paytim xo‘jalik ishlari bo‘yicha o‘rinbosarim borib olib kelgan ekan. Aksariyati kul. Bizga o‘tgan yili berilgan ko‘mir ham sifatsiz edi. Bu yilgisi undan ham battar. Yil yakuniga borib, ko‘mir yetmay qolish holatlarining sabablari mana shunda. O‘zimizga o‘zimiz hozirdanoq muammo yaratamiz”.
Direktorning bildirishicha, ushbu umumta’lim maktabida 3 ta ko‘mirga moslashtirilgan qozonxona mavjud.
“Ammo qozonxonalarimiz yetarli darajada isitmagani sababli 15 ta sinfxonaga qo‘shimcha pech o‘rnatamiz, — deydi ta’lim muassasasi rahbari. – Sinfxonalar asosan o‘sha pechlardan foydalangan holda isitiladi”.
Izoh (0)