O‘zbekiston Respublikasi Qurolli Kuchlari akademiyasining infratuzilmasini hamda ta’lim-tarbiyaviy jarayonini takomillashtirish yo‘lida akademiya binosida Pokiston qurolli kuchlariga bag‘ishlangan mavzuviy mashg‘ulot xonasini yaratish bo‘yicha ishlar boshlab yuborildi. Bu haqda Mudofaa vazirligi matbuot xizmati “Daryo”ga ma’lum qildi.
Pokiston Milliy mudofaa universiteti hamda Quruqlikdagi qo‘shinlari qo‘mondonlik-shtab kolleji bilan o‘zaro aloqalarni mustahkamlash maqsadida yaratilayotgan ushbu xona orqali mashg‘ulotlarni masofadan turib o‘tkazishning imkoni paydo bo‘ladi.
Yaqinda Pokistonning O‘zbekistondagi harbiy atteshesi polkovnik Imron Orif erishilgan kelishuvlar doirasida Qurolli Kuchlar akademiyasiga bir qator ko‘rgazmali qo‘llanmalar va o‘z mamlakati qurolli kuchlariga tegishli jihozlarni topshirdi. Ayni vaqtda birgalikda xonaga stendlarni joylashtirish ishlari olib borilmoqda.
Shu bilan birga Pokiston Mudofaa vazirligi tasarrufidagi harbiy ta’lim muassasalari bilan videokonferensiya aloqani o‘rnatish, shuningdek, pokistonlik mutaxassislarning O‘zbekiston Qurolli Kuchlari akademiyasida uzoq muddat mashg‘ulot o‘tishi masalalari ko‘rib chiqilyapti.
Bundan tashqari Qurolli Kuchlar akademiyasi Fransiya qurolli kuchlariga qarashli harbiy maktablar bilan ham hamkorlik qilib kelmoqda. Ta’kidlash kerakki, fransiyalik mutaxassislar Mudofaa vazirligi tizimidagi oliy harbiy ta’lim muassasalari orasida birinchilardan bo‘lib aynan Qurolli Kuchlar akademiyasi kursantlariga fransuz tilidan dars berishni yo‘lga qo‘ydi. Xozirda akademiyada Fransiyaga oid mavzuviy mashg‘ulot xonasi ham jihozlanmoqda.
Stendlar xorijlik hamkorlar tomonidan taqdim etilgan harbiy texnika maketlari, chet el armiyasiga tegishli atributlar, jurnal va kitoblar bilan boyitilmoqda. Bunda Fransiyaning O‘zbekistondagi elichixonasi harbiy attashesi podpolkovning Jan-Mari Xolsinger ham amaliy yordam ko‘rsatyapti.
Izoh (0)