Surxondaryo viloyatidagi Komfort Inert Servis mas’uliyati cheklangan jamiyati Sherobod tumani tog‘li “Zarabog‘” qishloq fuqarolar yig‘ini hududida granit va gabbro toshlarini qazib olib, qayta ishlash korxonasini foydalanishga topshirdi. Bu haqda O‘zA xabar berdi.
Shu munosabat bilan o‘tkazilgan tadbirda davlat va jamoat tashkilotlari vakillari, mehnat faxriylari, yoshlar va korxona ishchilari ishtirok etdi.
Prezident 2017-yil 10—11-fevral kunlari Surxondaryo viloyatiga tashrifi chog‘ida mazkur loyiha bilan tanishib, tegishli ko‘rsatmalar bergan edi. Shunga muvofiq, korxona zamonaviy xorij uskunalari bilan jihozlanib, noyob pardozbop qurilish materiallari ishlab chiqarishni yo‘lga qo‘ydi. Qiymati 2,5 million dollarlik asbob-uskunalar bir yilda 300 ming kvadrat-metr granit va gabbro toshlarini qazib olib, qayta ishlash quvvatiga ega.
– Korxonani qurib, ishga tushirish uchun 5 million 100 ming dollar mablag‘ sarflandi, – deydi Komfort Inert Servis mas’uliyati cheklangan jamiyati ta’sischisi B.Qodirov. – Bunda tashlandiq besh gektar yer maydoni va bo‘sh turgan binolar “nol” xarid qiymatida berilgani tabiiy pardozbop toshlarni qayta ishlash jarayonini tezlashtirish uchun qulay imkoniyat yaratdi. Mavjud inshootlar tubdan rekonstruksiya qilinib, xorij uskunalari o‘rnatildi. Bu ishlarni tez, sifatli amalga oshirishga “O‘zsanoatqurilishbank” aksiyadorlik tijorat banki yaqindan ko‘maklashib, 2,2 million dollar miqdorida kredit mablag‘i ajratdi.
Tog‘li qishloqda qad rostlagan korxonada ikki yuzdan ortiq aholi bandligi ta’minlandi. Ularning aksariyati yoshlardir.
– Sherobod iqtisodiyot kasb-hunar kollejini tugatganman, – deydi yosh mutaxassis X.Quvondiqov. – O‘zimga munosib ish izlab yurgandim. Qishloqqa yaqin hududda ish boshlagan shu korxonaga operator bo‘lib ishga joylashdim. Bu yerga o‘rnatilgan asbob-uskunalar zamonaviy kompyuter yordamida boshqariladi. Bu ishni tez o‘zlashtirib oldim. Ayni paytda granit toshlarni qayta ishlab, pardozbop qurilish materiali tayyorlanmoqda. Bizning unumli mehnat qilishimiz uchun barcha sharoit yaratilgan.
Yangi korxonada ishlab chiqarilayotgan tayyor materiallar mamlakatda barpo etilayotgan zamonaviy qurilish inshootlariga yetkazib beriladi. Mahalliy ehtiyojdan ortiq qismi xorijga eksport qilinadi.
Tadbirda Surxondaryo viloyati hokimi vazifasini bajaruvchi B.Po‘latov so‘zga chiqdi.
Izoh (0)