Сурхондарёда гранит ва габбро тошларини қазиб олиб қайта ишлаш корхонаси фойдаланишга топширилди

Сурхондарё вилоятидаги Komfort Inert Servis масъулияти чекланган жамияти Шеробод тумани тоғли «Зарабоғ» қишлоқ фуқаролар йиғини ҳудудида гранит ва габбро тошларини қазиб олиб, қайта ишлаш корхонасини фойдаланишга топширди. Бу ҳақда ЎзА хабар берди.

Шу муносабат билан ўтказилган тадбирда давлат ва жамоат ташкилотлари вакиллари, меҳнат фахрийлари, ёшлар ва корхона ишчилари иштирок этди.

Президент 2017 йил 10—11 февраль кунлари Сурхондарё вилоятига ташрифи чоғида мазкур лойиҳа билан танишиб, тегишли кўрсатмалар берган эди. Шунга мувофиқ, корхона замонавий хориж ускуналари билан жиҳозланиб, ноёб пардозбоп қурилиш материаллари ишлаб чиқаришни йўлга қўйди. Қиймати 2,5 миллион долларлик асбоб-ускуналар бир йилда 300 минг квадрат-метр гранит ва габбро тошларини қазиб олиб, қайта ишлаш қувватига эга.

– Корхонани қуриб, ишга тушириш учун 5 миллион 100 минг доллар маблағ сарфланди, – дейди Komfort Inert Servis масъулияти чекланган жамияти таъсисчиси Б.Қодиров. – Бунда ташландиқ беш гектар ер майдони ва бўш турган бинолар «нол» харид қийматида берилгани табиий пардозбоп тошларни қайта ишлаш жараёнини тезлаштириш учун қулай имконият яратди. Мавжуд иншоотлар тубдан реконструкция қилиниб, хориж ускуналари ўрнатилди. Бу ишларни тез, сифатли амалга оширишга «Ўзсаноатқурилишбанк» акциядорлик тижорат банки яқиндан кўмаклашиб, 2,2 миллион доллар миқдорида кредит маблағи ажратди.

Тоғли қишлоқда қад ростлаган корхонада икки юздан ортиқ аҳоли бандлиги таъминланди. Уларнинг аксарияти ёшлардир.

– Шеробод иқтисодиёт касб-ҳунар коллежини тугатганман, – дейди ёш мутахассис Х.Қувондиқов. – Ўзимга муносиб иш излаб юргандим. Қишлоққа яқин ҳудудда иш бошлаган шу корхонага оператор бўлиб ишга жойлашдим. Бу ерга ўрнатилган асбоб-ускуналар замонавий компьютер ёрдамида бошқарилади. Бу ишни тез ўзлаштириб олдим. Айни пайтда гранит тошларни қайта ишлаб, пардозбоп қурилиш материали тайёрланмоқда. Бизнинг унумли меҳнат қилишимиз учун барча шароит яратилган.

Янги корхонада ишлаб чиқарилаётган тайёр материаллар мамлакатда барпо этилаётган замонавий қурилиш иншоотларига етказиб берилади. Маҳаллий эҳтиёждан ортиқ қисми хорижга экспорт қилинади.

Тадбирда Сурхондарё вилояти ҳокими вазифасини бажарувчи Б.Пўлатов сўзга чиқди.