Joriy yilning 29—31-oktabr kunlari Toshkentda O‘zbekiston neft va gaz sanoatida GTL loyihasi bo‘yicha kreditorlar yig‘ilishi bo‘lib o‘tdi. Bu haqda “O‘zbekneftgaz” AJ matbuot xizmati xabar berdi.
Unda ishtirok etish uchun Koreya eksport-import banki, Koreya savdo va sug‘urta korporatsiyasi, “Gazprom” aksiyadorlik jamiyati, “Roseksimbank” aksiyadorlik jamiyati hamda Eksport kreditlari va investitsiyalarni sug‘urtalash bo‘yicha Rossiya agentligi vakillaridan iborat kreditorlar delegatsiyasi Toshkentga tashrif buyurdi.
“Sho‘rtan gaz-kimyo majmuasining tozalangan metan asosida sintetik suyuq yoqilg‘ini ishlab chiqarish” (UzGTL) loyihasi doirasida O‘zbekistonning Qashqadaryo viloyatida eng zamonaviy standarlarga javob beradigan zavod quriladi. GTL yoki “gazdan suyuqlik” texnologiyasiga asoslangan bu kabi yuqori texnologiyali ishlab chiqarishlar dunyo bo‘ylab sanoqli – Janubiy Afrika Respublikasi, Malayziya va Qatarda.
Zavod yiliga 1,5 million tonnadan ortiq Yevro-5 standartiga mos yuqori sifatli sintetik suyuq yoqilg‘ini ishlab chiqaradi.
Yig‘ilishni “O‘zbekneftgaz” aksiyadorlik jamiyati boshqaruv raisining birinchi o‘rinbosari Ulug‘bek Sayidov ochib berdi. “Avvalo, mazkur loyihani moliyalashtirishga qiziqish bildirgan hurmatli kreditorlarimiz hamda barcha maslahatchilarimizga o‘z minnatdorchiligimni izhor etaman. Ma’lumki, GTL loyihasi O‘zbekiston uchun strategik loyihadir. Uning amalga oshirilishi mamlakatlarimiz o‘rtasidagi iqtisodiy hamkorlikda yana bir qadam bo‘lib xizmat qiladi. Bugungi kunda O‘zbekiston o‘z oldiga iqtisodiy o‘sish bo‘yicha yangi maqsadlarni qo‘ymoqda va bunda yoqilg‘i-energetika resurslariga, ayniqsa, GTL mahsulotlariga bo‘lgan talab tez sur’atlar bilan o‘sib bormoqda. Bu omil va jahon neft narxlarining o‘sish tomon sur’atlari GTL loyihasining jozibadorligini yanada oshirmoqda”, —deya ta’kidladi Ulug‘bek Sayidov.
Ulug‘bek Sayidov koreyalik hamkorlarni turli masalalarni muvofiqlashtirish va hal qilishda professional yondashuvlari uchun minnatdorchilik bildirdi, loyihani o‘z vaqtida amalga oshirish muhimligini anglab moliyalashtirish jarayonini tezlashtirishga tayyor turgan rossiyalik sheriklarning hissasini alohida ta’kidladi hamda mazkur loyihani moliyalashtirishga birinchi bora kirishayotgan xitoylik hamkorlarga ham tashakkur bildirdi.
“Sizga mamnuniyat bilan ma’lum qilamizki, davlatimiz hukumati GTL loyihasining yakuniy moliyalashtirish tuzilmasini ma’qulladi va joriy yilning noyabr oyi oxiriga qadar barcha moliyalashtirish masalalarini muvofiqlashtirishni yakunlash va kreditlarni jalb qilishni boshlash vazifasini qo‘ydi. Umid qilamanki, mazkur uchrashuv ishtirokchilarga bu vazifani bajarish imkonini beradi”, — deya so‘zini yakunladi “O‘zbekneftgaz” aksiyadorlik jamiyati boshqaruv raisining birinchi o‘rinbosari.
Yig‘ilishda “Uzbekistan GTL” mas’uliyati cheklangan jamiyati bilan kreditorlar vakillari hamda loyiha bo‘yicha maslahatchilar o‘rtasida loyihani moliyalashtirishning umumiy shartlari to‘g‘risidagi kelishuv loyihasiga bog‘liq masalalar muhokama etildi. Shuningdek, yig‘ilish doirasida 1-noyabr kuni kreditorlar delegatsiyasi a’zolari Qashqadaryo viloyatidagi UzGTL qurilish maydonida joylashgan obyektlarida bo‘ladi va yangi zavod qurilishi jarayoni bilan tanishadi.
Aytib o‘tish kerakki, “Sho‘rtan gaz-kimyo majmuasining tazalangan metan asosida sintetik suyuq yoqilg‘ini ishlab chiqarish” (UzGTL) loyihasi O‘zbekiston Respublikasi Prezidentining 2016-yil 29-dekabr kunidagi PQ-2706-sonli qaroriga muvofiq amalga oshirilmoqda. Loyihani amalga oshirish tabiiy gazni chuqur qayta ishlash quvvatini kengaytirish, uglevodorod importini qisqartirish, yuqori sifatli va ekologik toza yoqilg‘iga ichki ehtiyojni qoplash hamda bozorni mahalliy xomashyodan ishlab chiqarilgan strategik mahsulotlar bilan ta’minlash imkonini beradi.
Yangi yuqori texnologiyali ishlab chiqarish O‘zbekiston neft va gaz sanoatiga uglevodorodlarni chuqur qayta ishlashning yangi bosqichiga o‘tish uchun muhim qadamdir. Hisob-kitoblarga ko‘ra, loyihani amalga oshirish neft mahsulotlarining yiliga 1,5 million tonnagacha importi o‘rnini bosish imkonini beradi. Sintetik suyuq yoqilg‘ini ishlab chiqarish uchun mo‘ljallangan zavodning xomashyo bazasi Sho‘rtan gaz-kimyo majmuasining tozalangan metanidir. Uning hajmi yiliga 3,6 milliard kub metrni tashkil etadi.
Izoh (0)