Жорий йилнинг 29—31 октябрь кунлари Тошкентда Ўзбекистон нефть ва газ саноатида GTL лойиҳаси бўйича кредиторлар йиғилиши бўлиб ўтди. Бу ҳақда «Ўзбекнефтгаз» АЖ матбуот хизмати хабар берди.
Унда иштирок этиш учун Корея экспорт-импорт банки, Корея савдо ва суғурта корпорацияси, «Газпром» акциядорлик жамияти, «Roseксимбанк» акциядорлик жамияти ҳамда Экспорт кредитлари ва инвестицияларни суғурталаш бўйича Россия агентлиги вакилларидан иборат кредиторлар делегацияси Тошкентга ташриф буюрди.
«Шўртан газ-кимё мажмуасининг тозаланган метан асосида синтетик суюқ ёқилғини ишлаб чиқариш» (UzGTL) лойиҳаси доирасида Ўзбекистоннинг Қашқадарё вилоятида энг замонавий стандарларга жавоб берадиган завод қурилади. GTL ёки «газдан суюқлик» технологиясига асосланган бу каби юқори технологияли ишлаб чиқаришлар дунё бўйлаб саноқли – Жанубий Африка Республикаси, Малайзия ва Қатарда.
Завод йилига 1,5 миллион тоннадан ортиқ Евро-5 стандартига мос юқори сифатли синтетик суюқ ёқилғини ишлаб чиқаради.
Йиғилишни «Ўзбекнефтгаз» акциядорлик жамияти бошқарув раисининг биринчи ўринбосари Улуғбек Сайидов очиб берди. «Аввало, мазкур лойиҳани молиялаштиришга қизиқиш билдирган ҳурматли кредиторларимиз ҳамда барча маслаҳатчиларимизга ўз миннатдорчилигимни изҳор этаман. Маълумки, GTL лойиҳаси Ўзбекистон учун стратегик лойиҳадир. Унинг амалга оширилиши мамлакатларимиз ўртасидаги иқтисодий ҳамкорликда яна бир қадам бўлиб хизмат қилади. Бугунги кунда Ўзбекистон ўз олдига иқтисодий ўсиш бўйича янги мақсадларни қўймоқда ва бунда ёқилғи-энергетика ресурсларига, айниқса, GTL маҳсулотларига бўлган талаб тез суръатлар билан ўсиб бормоқда. Бу омил ва жаҳон нефть нархларининг ўсиш томон суръатлари GTL лойиҳасининг жозибадорлигини янада оширмоқда», —дея таъкидлади Улуғбек Сайидов.
Улуғбек Сайидов кореялик ҳамкорларни турли масалаларни мувофиқлаштириш ва ҳал қилишда профессионал ёндашувлари учун миннатдорчилик билдирди, лойиҳани ўз вақтида амалга ошириш муҳимлигини англаб молиялаштириш жараёнини тезлаштиришга тайёр турган россиялик шерикларнинг ҳиссасини алоҳида таъкидлади ҳамда мазкур лойиҳани молиялаштиришга биринчи бора киришаётган хитойлик ҳамкорларга ҳам ташаккур билдирди.
«Сизга мамнуният билан маълум қиламизки, давлатимиз ҳукумати GTL лойиҳасининг якуний молиялаштириш тузилмасини маъқуллади ва жорий йилнинг ноябрь ойи охирига қадар барча молиялаштириш масалаларини мувофиқлаштиришни якунлаш ва кредитларни жалб қилишни бошлаш вазифасини қўйди. Умид қиламанки, мазкур учрашув иштирокчиларга бу вазифани бажариш имконини беради», — дея сўзини якунлади «Ўзбекнефтгаз» акциядорлик жамияти бошқарув раисининг биринчи ўринбосари.
Йиғилишда «Uzbekistan GTL» масъулияти чекланган жамияти билан кредиторлар вакиллари ҳамда лойиҳа бўйича маслаҳатчилар ўртасида лойиҳани молиялаштиришнинг умумий шартлари тўғрисидаги келишув лойиҳасига боғлиқ масалалар муҳокама этилди. Шунингдек, йиғилиш доирасида 1 ноябрь куни кредиторлар делегацияси аъзолари Қашқадарё вилоятидаги UzGTL қурилиш майдонида жойлашган объектларида бўлади ва янги завод қурилиши жараёни билан танишади.
Айтиб ўтиш керакки, «Шўртан газ-кимё мажмуасининг тазаланган метан асосида синтетик суюқ ёқилғини ишлаб чиқариш» (UzGTL) лойиҳаси Ўзбекистон Республикаси Президентининг 2016 йил 29 декабрь кунидаги ПҚ-2706-сонли қарорига мувофиқ амалга оширилмоқда. Лойиҳани амалга ошириш табиий газни чуқур қайта ишлаш қувватини кенгайтириш, углеводород импортини қисқартириш, юқори сифатли ва экологик тоза ёқилғига ички эҳтиёжни қоплаш ҳамда бозорни маҳаллий хом ашёдан ишлаб чиқарилган стратегик маҳсулотлар билан таъминлаш имконини беради.
Янги юқори технологияли ишлаб чиқариш Ўзбекистон нефть ва газ саноатига углеводородларни чуқур қайта ишлашнинг янги босқичига ўтиш учун муҳим қадамдир. Ҳисоб-китобларга кўра, лойиҳани амалга ошириш нефть маҳсулотларининг йилига 1,5 миллион тоннагача импорти ўрнини босиш имконини беради. Синтетик суюқ ёқилғини ишлаб чиқариш учун мўлжалланган заводнинг хом ашё базаси Шўртан газ-кимё мажмуасининг тозаланган метанидир. Унинг ҳажми йилига 3,6 миллиард куб метрни ташкил этади.
Изоҳ (0)