Superliganing “Lokomotiv”—“Metallurg” o‘yinidan so‘ng matbuot anjumani o‘tkazilmadi. Sababi — unga birorta jurnalist kelmadi

Bugun, 31-oktabr kuni O‘zbekiston Pepsi Superligasining 28-turidan o‘rin olgan “Lokomotiv”—“Metallurg” o‘yinidan so‘ng matbuot anjumani o‘tkazilmadi. Bu haqda “Lokomotiv” matbuot xizmati “Daryo”ga ma’lum qildi.

“Lokomotiv” o‘z maydonida Bekobodning “Metallurg” klubini qabul qilib, Anzur Ismoilovning 90-daqiqada kiritgan goli sabab g‘alaba qozondi.​

Uchrashuvdan so‘ng odatga ko‘ra, ikki jamoa bosh murabbiyi va futbolchilari matbuot anjumanida ishtirok etishi kerak edi. Ma’lum qilinishicha, o‘yindan so‘ng matbuot anjumaniga biror-bir sayt yoki gazetadan jurnalist tashrif buyurmagan. Kelgani ham ketib qolgan. Shu sababli ikkala jamoa bosh murabbiyi va futbolchilari o‘rtasida o‘tkazilishi kerak bo‘lgan matbuot anjumani o‘tkazilmagan.

Qayd etish joiz, kecha, 30-oktabr sanasida O‘zbekiston Professional futbol ligasi mamlakatdagi o‘zbek futbolini yoritib borishga mo‘ljallangan Championat.asia xodimlarining akkredatsiyalarini bekor qilgani haqida xabar berilgandi. Mazkur sayt Superliganing ko‘plab o‘yinlarini keng formatda yoritib kelayotgandi.