O‘zbekiston Respublikasi Bosh vazir o‘rinbosari Zoyir Mirzayev 29-oktabr kuni o‘z lavozimidan ozod etilishi kutilmoqda. Bu haqda hukumat manbasiga tayanib “Daryo” muxbiri Sevara Nishonova xabar berdi.
27-oktabr kuni ijtimoiy tarmoqlarda Toshkent viloyati Oqqo‘rg‘on tumani, “Abdunosir G‘ulom” fermer xo‘jaligi maydonida yuz bergan holat surati tarqaldi. Ushbu suratda Bosh vazir o‘rinbosari Zoir Mirzayev g‘allaga o‘z vaqtida suv quymagan mas’ul va fermerlarni ariq suviga tushirib qo‘ygan holda jazolagani aks etgan edi.
“Daryo”ning hukumatdagi manbasi xabar berishicha, bugun, 29-oktabr kuni selektor yig‘ilishi bo‘lib o‘tishi rejalashtirilmoqda. Ushbu yig‘ilishda Bosh vazir o‘rinbosari Zoyir Mirzayevning o‘z lavozimidan ozod etilishi kutilmoqda.
Qayd etilishicha, ushbu holatga Zoyir Mirzayevning ishdan bo‘shatilishi bilan nuqta qo‘yilmaydi. O‘zbekiston Respublikasi Bosh prokuraturasi masalaning huquqiy jihatlarini o‘rganib, tekshiruv ishlarini olib boradi va aybdorlar qattiq jazolanadi.O‘zbekiston Prezidenti Shavkat Mirziyoyev rahbarlik lavozimida faoliyat yuritayotgan shaxslar barchaga namuna bo‘lishi lozimligi haqida ko‘p bora ta’kidlagan:
“Qo‘l ostidagi xodimlar sizga faqat ish yuzasidan bo‘ysunishi, qolgan masalalarda siz bilan teppa-teng huquq egasi ekanini aslo esingizdan chiqarmang! Mana shu gaplarni jamoatchilikka, hammaga yetkazishingizni iltimos qilaman. Qonunlarimizda bunday xatti-harakatlar uchun javobgarlik belgilangani, jazo muqarrar ekanini unutishga hech kimning haqqi yo‘q.
Barchangiz yaxshi bilasiz, xalqimiz oriyatli, nomusli xalq. Xalq barcha narsaga chidashi mumkin, lekin, takror va takror aytaman, adolatsizlik va nohaqlikka aslo chiday olmaydi. Haqiqiy rahbar, haqiqiy yetakchi odamlarning bardoshini sinash uchun emas, balki ularga munosib shart-sharoit yaratib berish, og‘irini yengil qilish uchun rahbar etib tayinlanadi”.
Izoh (0)