UzCard karta egalariga kengaytirilgan xizmat turini taqdim etish maqsadida Yagona umumrespublika protsessing markazi mutaxassislari CINEO C4560 rusumidagi yangi bankomatlarga tegishli dasturiy ta’minotni o‘rnatdi.
UzCard matbuot xizmati axborotiga ko‘ra, CINEO C4560 rusumidagi serqirra bankomatlar Diebold Nixdorf konserni tomonidan yetkazib berilmoqda. Hozirgacha ushbu rusumdagi bankomatlar O‘zbekistondagi bir qator banklar tomonidan xarid qilingan.
CINEO C4560 ning amaldagi boshqa bankomatlardan farqli afzalliklaridan biri — karta egasi xorij valyutasidagi naqd pullarini bankomat orqali konvertatsiya qilish imkoniyatiga ega. Ushbu bankomatga xizmat ko‘rsatuvchi bank tomonidan valyuta kursi beligilanadi, bunda karta egasidan komission to‘lovlar yechib olinmaydi.
“Ko‘p qirrali bankomat uzilishlarsiz xizmat ko‘rsatishi uchun barcha xavfsizlik talablariga javob beruvchi dasturiy ta’minot o‘rnatildi. Karta egalari ikkilanmasdan, plastik kartadagi ma’lumotlar xavfsiz saqlanayotganligiga amin bo‘lgan holda xizmatlardan foydalanishlari mumkin. Jumladan, bankomatlardan foydalanish qoidalariga rioya etish — pul mablag‘larining ximoyalangan va xavfsiz holda saqlanishini ta’minlaydi”, — deyiladi UzCard bayonotida.
Mutaxassislarning ta’kidlashlaricha, CINEO C4560 rusumidagi yangi bankomatlar odatiy vazifalardan tashqari, amaldagi boshqa bankomatlar qo‘llab-quvvatlamaydigan bir qator innovatsion xizmatlarni taqdim etgani bois, bankdagi butun bir bo‘limning o‘rnini bosa oladi.
Hozirda UzCard mutaxassislari tomonidan bir qator boshqa rusumdagi bankomatlarni integratsiya qilish, jumladan, GRG H68N NCR va Seif Serv6632 rusumidagi bankomatlarni o‘rnatish rejalashtirilgan. Ushbu rusumdagi bankomatlar ham konvertatsiya funksiyasini qo‘llab-quvvatlash qatorida qator innovatsion xizmatlarni o‘z mijozlariga taqdim etadi.
Izoh (0)