O‘zbekiston hukumati qolipli non (buxanka)ni Narxlari (tariflari) davlat tomonidan tartibga solinadigan ijtimoiy ahamiyatli tovarlar (xizmatlar) va ularning strategik turlari ro‘yxatidan chiqarib tashlash niyatida. Bu 25-oktabr kuni jamoatchilik muhokamasiga qo‘yilgan hukumat qarori loyihasida ko‘zda tutilgan.
“Agar ushbu qaror qabul qilinadigan bo‘lsa, u holda davlat non narxini tartibga solishni rasman to‘xtatadi”, — deb yozadi “Podrobno.uz”.
Eslatib o‘tamiz, 15-sentabrdan O‘zbekistonda buxanka non narxi 650 so‘mdan birdan ikki barobarga — 1200 so‘mgacha oshdi. Shundan so‘ng keyingi bir necha kunlar davomida uning narxi 1050 so‘mgacha tushirildi. Buxanka non narxining bunday o‘zgarishi 15-sentabrdan boshlab mamlakatda qolipli non talab va taklif asosida shakllanadigan erkin bozor narxida sotila boshlangani bilan bog‘liq.
Narxlarning keskin o‘zgarib ketmasligi uchun 15-sentabrdan 1-nav bug‘doy uni uchun yagona ulgurji narx belgilangan. Keyinroq, mamlakat non sotishning yangi tartibiga moslashib ulgurganidan so‘ng, un ham bozor narxida sotuvga chiqarilishi rejalashtirilgan.
Ma’lumot uchun, Narxlari (tariflari) davlat tomonidan tartibga solinadigan ijtimoiy ahamiyatli tovarlar (xizmatlar) va ularning strategik turlari ro‘yxati bugungi kunda 21 banddan iborat bo‘lib, ular orasida un, paxta yog‘i, ijtimoiy muhim dori vositalari va tibbiy buyumlar, benzin, don, o‘g‘itlar, ko‘mir kabilar bor.
Izoh (0)