UzCard карта эгаларига кенгайтирилган хизмат турини тақдим этиш мақсадида Ягона умумреспублика процессинг маркази мутахассислари CINEO C4560 русумидаги янги банкоматларга тегишли дастурий таъминотни ўрнатди.
UzCard матбуот хизмати ахборотига кўра, CINEO C4560 русумидаги серқирра банкоматлар Diebold Nixdorf концерни томонидан етказиб берилмоқда. Ҳозиргача ушбу русумдаги банкоматлар Ўзбекистондаги бир қатор банклар томонидан харид қилинган.
CINEO C4560 нинг амалдаги бошқа банкоматлардан фарқли афзалликларидан бири — карта эгаси хориж валютасидаги нақд пулларини банкомат орқали конвертация қилиш имкониятига эга. Ушбу банкоматга хизмат кўрсатувчи банк томонидан валюта курси белигиланади, бунда карта эгасидан комиссион тўловлар ечиб олинмайди.
«Кўп қиррали банкомат узилишларсиз хизмат кўрсатиши учун барча хавфсизлик талабларига жавоб берувчи дастурий таъминот ўрнатилди. Карта эгалари иккиланмасдан, пластик картадаги маълумотлар хавфсиз сақланаётганлигига амин бўлган ҳолда хизматлардан фойдаланишлари мумкин. Жумладан, банкоматлардан фойдаланиш қоидаларига риоя этиш — пул маблағларининг химояланган ва хавфсиз ҳолда сақланишини таъминлайди», — дейилади UzCard баёнотида.
Мутахассисларнинг таъкидлашларича, CINEO C4560 русумидаги янги банкоматлар одатий вазифалардан ташқари, амалдаги бошқа банкоматлар қўллаб-қувватламайдиган бир қатор инновацион хизматларни тақдим этгани боис, банкдаги бутун бир бўлимнинг ўрнини боса олади.
Ҳозирда UzCard мутахассислари томонидан бир қатор бошқа русумдаги банкоматларни интеграция қилиш, жумладан, GRG H68N NCR ва Seif Serv6632 русумидаги банкоматларни ўрнатиш режалаштирилган. Ушбу русумдаги банкоматлар ҳам конвертация функциясини қўллаб-қувватлаш қаторида қатор инновацион хизматларни ўз мижозларига тақдим этади.
Изоҳ (0)