Joriy yilning 10—14-oktabr kunlari Germaniyaning Frankfurt-Mayn shahrida an’anaviy kitob va noshirlik ko‘rgazma-yarmarkasi bo‘lib o‘tdi. Unda mamlakatimiz nomidan O‘zbekiston matbuot va axborot agentligi tizimidagi nashriyotlar qatnashdi. Jumladan, “O‘zbekiston milliy ensiklopediyasi” Davlat ilmiy nashriyoti ko‘rgazmadan bir qancha foydali kelishuvlarga erishib qaytdi. Bu haqda “Daryo”ga matbuot va axborot agentligi xabar berdi.
Xususan, Belgiyaning Caramel nashriyoti bilan hamkorlik kelishuvi imzolanib, 18 ta bolalar adabiyotiga ixtisoslashgan kitoblarning original maketlarini sotib olish bo‘yicha 40 ming yevrolik kelishuvga erishildi.
Buyuk Britaniyaning Account executive nashriyoti bilan esa 50 dan ortiq ensiklopedik xarakterdagi bolalar kitoblari bo‘yicha mualliflik huquqini olish va O‘zbekistonda nashr etish bo‘yicha hamkorlikni yo‘lga qo‘yishga kelishildi.
Avstriyaning TBC global nashriyoti bilan innovatsion bolalar kitoblarini O‘zbekistonda nashr etish, xususan, delegatsiya a’zolariga ma’qul bo‘lgan 20 dan ortiq kitoblarning yaratilishi texnikasini o‘rganish bo‘yicha kelishuvlarni amalga oshirdi.
Izoh (0)