Qashqadaryo viloyati Nishon tumanida ayni paytda jami 7 ta madaniy meros obyekti mavjud, deb yozadi “Qashqadaryo” gazetasi.
Ular Guliston mahallasi Otquduq qishlog‘ida joylashgan Nayman ota maqbarasi, Nishon mahallasi Govur qishlog‘ida joylashgan, X-XII asrlarga tegishli bo‘lgan Rabottepa, X-XV asrlarga taalluqli Sandiqlitepa, Gulibodomtepa arxeologik yodgorliklari, shuningdek, Yangi Nishon shahrining O‘zbekiston ko‘chasidagi 1984-yilda bunyod etilgan Motamsaro ona, 1985-yilda “Talimarjon” suv omborida qurilgan “Farhod” haykali hamda 1980-yilda Yangi Nishon shahri Paxtakor mahallasi hududidagi Ikkinchi jahon urushi qatnashchilari sharafiga o‘rnatilgan monument yodgorliklaridir.
Mazkur madaniy meros obyektlarining deyarli barchasi e’tibor markazidan chetda qolib ketgan.
Misol uchun, Nayman ota maqbarasini olaylik. Ushbu maqbara tumanning Otquduq qishlog‘i hududidagi baland tepalik yon bag‘rida to‘rtburchak shaklda pishiq g‘ishtdan bunyod etilgan bo‘lib, 2 xonadan iborat. Balandligi 4,3 metrni tashkil etadi.
Maqbara uzoq tarixga ega. U bilan bog‘liq juda ko‘plab rivoyatlar, tarixiy manbalar mavjud. Bu yerga har hafta ko‘plab ziyoratchilar kelib turishadi. Lekin ayni paytda maqbarada ziyoratchilar uchun yetarli shart-sharoit yaratilmagan, atrofi o‘rab olinmagan. Shuningdek, Rabottepa, Gulibodomtepa va Sandiqlitepa arxeologik yodgorliklarining ham atrofi o‘ralmagan va ularning arxeologik yodgorlik ekanligini bildiruvchi hech qanday belgilar mavjud emas.
“Talimarjon” suv omborining ramziga aylanishi kutilgan “Farhod” haykali, Ikkinchi jahon urushi qatnashchilariga o‘rnatilgan monumental san’at yodgorligi ham qarovsiz ahvolda. Ularning yon-atrofida obodonlashtirish ishlari olib borilmagan.
Mavjud yettita moddiy-madaniy va arxeologik meros obyektining birortasi davlat kadastr ro‘yxatiga kiritilmagan. Birgina “Motamsaro ona” monumental san’at yodgorligi tuman madaniyat bo‘limi balansida, xolos, qolganlari esa egasiz.
Izoh (0)