Toshkent viloyati davlat soliq boshqarmasi tomonidan Toshkent tumanidagi Uchqahramon savdo majmuasi hududida profilaktik nazorat tadbiri o‘tkazildi, deb xabar beradi soliq qo‘mitasi matbuot xizmati.

“Ushbu tadbirda fuqaro Mamayusuf Ashurov 11 A/B-sonli do‘konda bemalol savdo qilayotganiga duch keldik. Shu o‘rinda savol tug‘iladi. Na savdo faoliyatiga ruxsat beruvchi patenti, na mahsulotlarining hujjati bo‘lgan bu shaxsga savdo majmuasi rahbariyati tomonidan Vazirlar Mahkamasining 2012-yil 28-avgustdagi 253-sonli qaroriga zid ravishda tadbirkorlik faoliyatini amalga oshirish uchun sharoit yaratib berganini qanday tushunish mumkin?

Davlat qonunlariga bepisandlik bilan qarash tufayli tumanning “Choshtepa” ko‘chasida ham qonun buzilish holatlariga yo‘l qo‘yilgan. Shundoqqina serqatnov yo‘l bo‘yida avtomobil ehtiyot qismlari savdosini yo‘lga qo‘ygan fuqaro Odil Muxsimov davlat soliq xodimlari tomonidan rasmiy ogohlantirish xati olganiga qaramay, yana qonunni buzib tursa-ya. Yohud qonundan ustunman deguvchi o‘ziga ishongan orqa tog‘lari bormikan uning?

Soliqlar taraqqiyotimiz tayanchi, bunga shubha yo‘q. Ammo soliq to‘lamay, taraqqiyotimiz rivojiga bilib-bilmay bolta urayotgan qo‘shtirnoq ichidagi tadbirkorlar, afsuski, uchrab turibdi. Nazorat tadbirlarida zamonaviy dastgohlar yordamida bejirim poyafzallar ishlab chiqarayotgan Zangiota tumani, Eshonguzar qo‘rg‘onidagi fuqaro Vahob Fayziyevga faoliyatini qonuniy yuritganida edi, unga hozir tahsinlar aytayotgan bo‘larmidik?

Soliq xizmati xodimlari o‘z faoliyatini rasmiylashtirmagan 4 yigitga mehnat stajining pensiyaga chiqishdagi afzalliklari, ‘konvert’ usulida oylik maosh olish jinoyat ekanligi hamda qonuniy tadbirkorlik uchun barcha sharoitlar yaratib berilgani batafsil tushuntirildi.

Profilaktik nazorat tadbirlari davomida Eshonguzar mahalla yig‘ini hududida fuqaro Shohsanam Odilova tomonidan oziq-ovqat mahsulotlarining noqonuniy savdosi yo‘lga qo‘yilgani ham ma’lum bo‘ldi”, — deyiladi xabarda.