Xitoy rasmiylari Shanxaydagi ibodatxonalarning biridan aldov yo‘li bilan qariyb 600 ming yuan (taxminan 85 ming dollar) pulni qo‘lga kiritgan erkakka nisbatan qidiruv e’lon qildi. U pullarni Porsche avtomobili sotib olish uchun sarflagan. Bu haqda “RIA Novosti” xabar berdi.
Shaharning Fensyan tumanida joylashgan ibodatxona 2017-yilda daydi hayvonlar uchun turar joy tashkil qilish maqsadida yer uchastkasi topishga uringan. Bu ishda Yan familiyali erkak vositachi bo‘lgan. U Shanxayga qo‘shni bo‘lgan Ninbo shahridagi maktablardan birida mos keluvchi joyni topgan.
2017-yilning 16-oktabrida firibgar ibodatxona rahbariyatiga qalbaki shartnomani taqdim etgan. Mazkur qalbaki hujjatda 40 gektarli yer maydonining 800 ming yuan (114 ming dollardan ko‘proq) evaziga 35 yilga ijaraga berilishi ko‘zda tutilgan edi. Uch kundan keyin ibodatxona rahbari barcha pullarni o‘tkazgan. Shundan so‘ng, 23-oktabr kuni Yan maktab rahbariyati bilan haqiqiy shartnomani imzolagan. Haqiqiy shartnomada 10 gektar maydonni 210 ming yuan (31 ming dollar) evaziga ijaraga berish nazarda tutilgan. Qolgan pullarga esa erkak o‘zi uchun Porsche Cayenne avtomobilini sotib olgan.
Ibodatxona rahbariyati shartnoma tafsilotlaridan xabar topgach, erkakdan pullarni 2018-yilning 1-mayigacha qaytarish talab qilingan. Firibgar barcha pullarni qaytarishga va’da bergan va kafolat sifatida ibodatxona hovlisida yangi avtomobili qoldirgan. Biroq u 1-mayda pulni qaytarmagan, mashinasini olib ketgan va g‘oyib bo‘lgan. Uning ustidan politsiyaga shikoyat qilingan.
Ish uzoq ko‘rib chiqilganidan keyin, 2018-yilning sentabr oyi oxirida sud firibgarni qo‘lga olishga order bergan, u hali ham qidirilmoqda.
Izoh (0)