Хитой расмийлари Шанхайдаги ибодатхоналарнинг биридан алдов йўли билан қарийб 600 минг юан (тахминан 85 минг доллар) пулни қўлга киритган эркакка нисбатан қидирув эълон қилди. У пулларни Porsche автомобили сотиб олиш учун сарфлаган. Бу ҳақда «РИА Новости» хабар берди.
Шаҳарнинг Фэнсян туманида жойлашган ибодатхона 2017 йилда дайди ҳайвонлар учун турар жой ташкил қилиш мақсадида ер участкаси топишга уринган. Бу ишда Ян фамилияли эркак воситачи бўлган. У Шанхайга қўшни бўлган Нинбо шаҳридаги мактаблардан бирида мос келувчи жойни топган.
2017 йилнинг 16 октябрида фирибгар ибодатхона раҳбариятига қалбаки шартномани тақдим этган. Мазкур қалбаки ҳужжатда 40 гектарли ер майдонининг 800 минг юан (114 минг доллардан кўпроқ) эвазига 35 йилга ижарага берилиши кўзда тутилган эди. Уч кундан кейин ибодатхона раҳбари барча пулларни ўтказган. Шундан сўнг, 23 октябрь куни Ян мактаб раҳбарияти билан ҳақиқий шартномани имзолаган. Ҳақиқий шартномада 10 гектар майдонни 210 минг юан (31 минг доллар) эвазига ижарага бериш назарда тутилган. Қолган пулларга эса эркак ўзи учун Porsche Cayenne автомобилини сотиб олган.
Ибодатхона раҳбарияти шартнома тафсилотларидан хабар топгач, эркакдан пулларни 2018 йилнинг 1 майигача қайтариш талаб қилинган. Фирибгар барча пулларни қайтаришга ваъда берган ва кафолат сифатида ибодатхона ҳовлисида янги автомобили қолдирган. Бироқ у 1 майда пулни қайтармаган, машинасини олиб кетган ва ғойиб бўлган. Унинг устидан полицияга шикоят қилинган.
Иш узоқ кўриб чиқилганидан кейин, 2018 йилнинг сентябрь ойи охирида суд фирибгарни қўлга олишга ордер берган, у ҳали ҳам қидирилмоқда.
Изоҳ (0)