O‘zbekiston Prezidenti Shavkat Mirziyoyevning taklifiga binoan Rossiya Federatsiyasi Prezidenti Vladimir Putin davlat tashrifi doirasida Rossiyaning nufuzli oliy ta’lim muassasalari va respublikadagi oliy ta’lim muassasalari o‘rtasida malakali mutaxassislarni hamkorlikda tayyorlash maqsadida qo‘shma loyihalarni amalga oshirish bo‘yicha ko‘plab shartnomalar imzolanmoqda.
19-oktabr kuni “MEI” (Moskva energetika instituti) Milliy tadqiqotlar universitetining rektori N.D.Rogalev, O‘zbekiston Respublikasi Oliy va o‘rta maxsus ta’limi vaziri Inomjon Majidov hamda “O‘zbekenergo” aksiyadorlik jamiyati boshqaruv raisi Ulug‘bek Mustafoyev o‘rtasida “MEI” (Moskva energetika instituti) Milliy tadqiqotlar universitetining Toshkent shahridagi filialini ochilishiga tayyorgarlik ko‘rish to‘g‘risida kelishuvni imzolash marosimi bo‘lib o‘tdi. Bu haqida “O‘zbekenergo”AJ Matbuot xizmati xabar bermoqda.
Toshkentda mazkur universitet filialining ochilishi quyidagi yo‘nalishlarni o‘z ichiga oladi:- energetika sohasida muhim ilmiy-texnikaviy vazifalarni yechish imkoniga ega kadrlarni tayyorlash;
- elektr energiya tizimida tejamkorlikni oshirishga yo‘naltirilgan innovatsion loyihalarni amaliyotga tadbiq etish;
- energetika sohasida jahon andozalariga mos innovatsion tadqiqotlarni olib borish;
- tizimda va ishlab chiqarishning boshqa sohalarida elektr texnikalarining ekspluatatsiyasida samaradorlikni oshirish bo‘yicha ishlanmalarni tadbiq etish.
Ma’lumot o‘rnida: “MEI” (Moskva energetika instituti) Milliy tadqiqotlar universiteti Rossiyaning nufuzli oliygohlaridan biri hisoblanib, 1930-yilda tashkil etilgan. Mazkur oliy o‘quv yurti energetika, elektrotexnika, elektronika, informatsion texnologiyalar hamda radiotexnika kabi sohalarga mutaxassislar yetishtirib chiqaradi.
Izoh (0)